Girang doma ilala si Jarokek mardalan tu lopo si Jatondi i. Taru piulna pe logu India ma, logu ni Daramendra. Pincur doma bibir nia namarpiul i laos masuk tu lopo i.
“Baen susu tes i,” ningia tu parlopo i laos juguk lanom di bangku nailambung pintu lopo i.
“Bo, songon na sak-sak uida muko muyu, Jarokek,” ning Jaultop laos manyirup tes paet.
“Sak-sak mantong, nangkin 60 kilo tartimbang dabo apea i, arga na pe godang,” ningia.
“Au pe bahat do kiloanna nangkin di partimbangan an. 65 kilo, bahatan do iuda au i, au do gari bo margirang-girang, baru ho,” ning si Jarotib sian sudut ni lopo an, laos mangarsik sigaret Garendel.
Martata si Jatondi laos maroban tes susu tu meja si Jarokek i. Harana iboto ia aso sak-sak rupo si Jarokek di tonga ari i. Harana, ia pe mandapot do ia opat ari nalewat na demo tu kantor DPRD i.
“Uboto dei dabo so sak-sak muko nia,” ningia.
“Aha ma,” ning Jaultop.
“Dohot ia antong na demo tu DPRD i, mandapot 50 ribu,” ning Jatondi.
“Bo, na inan do langa. Iagan mantong sanga jia tu jia,” ning Jaultop.
Marsidokon nai dok na ma di lopo i. Adong antong mandokon nacocokan pala adong demo, harana pasti mandapot epeng, goarna “uang demo”. Ise pe namangontang, dot ia. Aha pe na demohon i, dot ia. Harana baen na epeng nai do so dot ia demo. “hidup” ning paroban demo i, “hidup” ningia.
“Au dabo, nasodong do ulala gunana mamabahas politik, inda adong dabo pangaruhna tu parusaoanku,” ning Jarotib.
“Aso mei songoni pandapotmu, Rotib,” ning Jaultop.
“Bo, aha mantong gunana ita bahas mutasi jabatan, ise pejabat on, ise pejabat i, masongonjia di kantor bupati an. Les namangguris do karejo on,” ningia.
“Adong dei dabo pengaruhna. Kotidak binoto parkembangan pamarentahan on,” ning Jarokek.
“Botul dei dabo porlu ita boto parkembangan politik. Tai antong, gonanan sugari parkembangan ekonomi pupu dibahas alak on, ampado politik” ning Jarotib.
“Soni do langa, aha ma pambahasan ekonomi nai maksud mi, Rotib,” ning Jaultop.
“Maksudku antong, mambahas politik sakadarna pe. Ipabahat mambahas ekonomi,” ning Jarotib.
“Baen mantong contona, so binoto,” ning Jarokek.
“Misalna, sadia do kabutuhan pira itik di kabupaten on. Salain di son tujia muse dei ikirim pira itik i, cukup do sanga urang pira itik nadihasilkon paritik di kabupaten on. Pala urang, tontu paluang ta mon maritik tamba ni tingon mangguris,” ning Jarotib.
“Olo ba. Songon ambeng, sajia bahat do kabutuhan ambeng tu Medan. Ubege ambeng pe nabahatan manjalai na sian Medan, obanon tu luar negeri. Pala marambeng iba, manggadis roa muyu 12 ambeng sataon kali sajuta, kan ma 12 juta. Bo margaji mei sajuta sabulan,” ning Jatondi.
“Ning roamu bersih ma jo na 12 juta i, bahat dope uang kaluar na i. Inda jabat sajuta sabulan bersihna i,” ning Jaultop.
“Olo, i kan baen na otik dope ambeng na. Pala bahat. Misalna 25 ambeng igadis sataon, ma 25 juta. Pala modal pamuliarona 8 juta sataon itamba 4 juta sataon pamulak modalna, ma mandapot ko 13 juta bersih. Lobi sajuta bersih ni untung na sabulan da,” ning Jatondi.
“I kan angan-angan dei, ijia dei igaer ko modal ni i, sonjia dei pala ro panyakit ni ambeng, sonjia dei manjalaki duhut panganonna” ning Jaultop.
“Bo, imantong so ekonomi on sajo sugari ibahas. Harana mur jot-jot dibahas, mur binoto dei cara-cara marambeng, tehnik marambeng, tehnik mangadongkon duhut panganonna, binoto juo mei pasaran ni ambeng,” ning Jatondi.
“Sangajo botul dei, anggo tiop ari ita mambahas ekonomi, mur bahat mei na binoto, mur bahat muse naso binoto, dung onok-onok mur pupu mei dapot jawabanna. Dungi dabo, ra dei tongkin nai pala penasaran ta mabahat, ra dei kehe ita tu kantor peternakan di kantor bupati an manyapai parkembangan ternak on, kan mur bahat mei na binoto,” ning Jabaring nasip sajo muloi nangkin.
“Bo, na les tu pamarentah juo do uida pambahasanna, kantor bupati, politik juo mon” ning Jarokek.
“Olo, botul mada Rokek. Tai inda be politik urusanna tu pamarentahan an, tai urusan ekonomi doma. Contona, ita pangido ikirim pamarentah i mantari hewan mangajari ita mamuliaro ambeng,” ning Jatondi.
“Bo, palalu ma ita pangido bantuan ambeng tu kantor bupati an so adong puliarohon di son, ita bontuk kelompok tani, ita baen permohonan na,” ning Jarokek.
“Les na pupu bantuan sajo ma pikirkononmu Rokek. Inda ra dabo i pala mangharop bantuan. Ita ligi ma alai namandapot bantuan ternak manuk na di kampung bariba i. Marbadai do alai samo lai namarkelompok tani i, ahirna gagal. Kandang nai pe ma marompak,” ning Jabaring.
“Botul dei naidokon si Baring i. Gonanan do pupu ita bahas aha na cocok usaho ita baen sesuai dot sinaloanta. Dungi, usao nasian bantuan pamarentah inda ra marhasil i. Harana usahoi ida ro sian bagasan ni dirinta. Gonanan do ita muloi sian usao namenek. Harana ganop ari mur ita boto mei ilmu mamuliaro ambeng. Mur maonok antong mur mamboto ma ita dunia ambeng, pupu muse manambai ambeng na, nga sodar iba 3 taon ma 20 ambeng niba, opat taon martamba manjadi 40 ambeng. 6 taon madung makayo iba,” ning Jatondi.
“Sangajo ra dei, asal ita tetap tiop ari torus mambahas ekonomi. Adong na marambeng, adong na maritik, adong na marmanuk, adong namargulaen. Kuncina 2 maia, totop ita bahas parsoalan ekonomi, ganop ari. Salalu ekonomi ita bahas. Ra dei. Mamabahas politik antong sasakali pe,” ning Jabaring. (dahlan batubara)
Comments
Komentar Anda