Dompak libur ni pagawe tar rami-ramido manyogot kombur dilopo si Jabulelei salaos manyirup-nyirup kopi sanga tes manis otik gulona, songoni dei antong dompak baru-baru pemilihan Bupati kecek nihalakpe antong kecek politikma, baru-baru margonti Bupati kecek pagawe musema natarbege, tup-tap dom ilala Jabulele manambai aek milas arana mur mrsitutu kombur ni halak.
Anggo udai si Karaddul nadapotan disia kecek pagawe, bope naso pagawe ia, nabotoan ia manuturkon satontang natarjadi di pamarentahan, ida ia masuk tubagasan lopoi namarbaju saragam, Nabulus idokon iama nangkan ibalun ni amanta Bupati nabaruroido pagawei anggo napatikal-tikalkon.
Urang doboto mangartina iba uda, angke nabahatan dabo isitilah niudai angkon naitorangkonni uda doba sanga ahadei maksudna pagawe napatikal-tikalkon, danakpe ibagas madung pagawema bope na stap gorarna ale, jadi sobinoto antong mangalehen tutur poda di ibana, malang ona balun muse anakta, tontu dohotdo uda susah ning Sutan mangkahap mantong mangalus.
Pagawe dabo inda tola dohot manjadi tim sukses pala pemilihan ni pamimpin, angkon netraldo pagawe, jadi nadung solpu nabahatan pagawe nadohot-dohotan marpolitik, arana angkan ilehen jabatan disia pala monang, palanga monang, mate haram do ibarat ni amporik naona katapel ning si Karaddul antong alusna.
Haraniima ningna caritoi angkan nabalunon ni amanta Bupati nabaruroondo pagawe nadohot-dohotan berkecimpung di kancah politik, itoskonia songon namanggogat bulu poring inda umna macancan, marjabir-jabir ning si Karaddul musema manguduti carito niai, salaos mangkortok –kortok.
Memang pala ipasari-sari dabo madung rundutdo karejoon, inda tola dohot marpolitik pagawe ningna paraturan, tai sabalikna pala indara dohot-dohotan ipatopi musedo, adongdo antong bukti kepala SMA Tambangan nasamarga musedoi dohot amanta Bupati nabaruroon, naso ibotoniado marpolitik, baen binotodo panjaharoni ibana, soboru olodo, baen nasoraido ningna ibana manjadi tim sukses di pemilihan ni Bupati nalewat, ipistakkon muse doboto, sian kepala sekolah manjadi guru biaso doma baya boto sannari, harani ulu do rupana narap lomlom, anggo kupiah naadong nabagedo narara sanga narata atope namarbolang-bolang ning bayo napakean saragami mantong mandohoti kombur dimanyogot niari.
Ipentong nabana mantongani dohot pagawe marpolitik salana, inda dohotpe salana, tai rap italigi majolo sanga songondiado ibaen amanta nabaruroon, arana anggo adong muse sada kepala sikola anso dohot-dohotania ningna baen namambuat jabatando, pala monang dabo ningna angkan namanjadi Camat, adong muse nangkan nagiot manjadi kepala bidang dikantor Dinas,tontu nahebatdei anggo nasongonima panjaharona, ita tontonma jolo songoni sanga songondiado tarina dohot gondangna ibenon ni amanta nabaruroon, ning si Karaddul muse antong mangalus.
Auboto khawatir doau, arana natangkangdo ningna amanta nabaruroon, lain parkouman lain tugas, lain PNS lin politik, inda nadong ningna sulaha nirona pala nasopade nangkan naibalundo mangarti maita pala jabat ona balun, ibul songon kaleren ning Sutan Mangkahap muse mantong laos manjeir dibagasan loponi si jabulelei

Comments

Komentar Anda