![markobar atau marhata-hata di Mandailing](https://i0.wp.com/www.mandailingonline.com/wp-content/uploads/2015/11/markobar-atau-marhata-hata-di-Mandailing.jpg?resize=400%2C207)
Assalamu’ alaikum warohmatullohi wabarokatuh
Parjolo au marsantabi sapuluh mangadopkon ula kahanggi, mora, anak boru. Saterusna hatobangon dohot na ipatobang, umumna na hadir di majalis paradatanon.
Mangihutkon umur dohot pamatang ni anak nami si Dalkit, patut dohot tamana ibana mamolus adat matobang. Diari nasolpui langka ibana tu jae tu julu manjalaki siangkup markaya donganna matobang.
Satibona ibana di alaman ni Pidoli Lombang, manatap mada ibana-tu jae tu julu, impol mada mata manaili adong ma nadisolom ni matana. Na tumbuk tupa tu panagarohaina dongan rongkap ni tondina, ima jagar-jagar ni mora.
Disi, taringot mada ibana dipituah ni natobang-tobang, muda ditinggalkon huta niba, ama dohot ina songoni dohot koum ula kahanggi ditopotkon huta ni halak, ama nai dohot ina dijalakan nangkan na jadi koum dohot kahanggi. Dijalakan doma jolo tehe kahanggi nita anso dioloskon di ibana maksud tujuan niba nangkan manyangkutkon hata niba tu jagar-jagar ni mora, botima di pamikiran ni ibana ima anaki di ari na solpui.
Ditopotkon na ma kahanggina di Pidoli Lombang, salaho dioloskon maksud tujuanna ima namanyangkutkon hata tu jagar-jagar ni mora, disi langka ma rupana kahanggi manopotkon jagar-jagar ni mora satorusna tu mora ima na manyangkutkon hatana. Disi mudah-mudahan dapot do parsatumbukanna dohot panamana. Tarsangkut mada hata ni anaki si Dalkit tu jagar-jagar ni mora nami, ima di Pidoli Lombang.
Diari nasolpui madung ami suru do kahanggi dohot anak boru manopotkon mora tu Pidoli Lombang, buat manangkasi hata ni daganak na tarsangkut, sanga na tutu na peto do, sanga na gonjak siayang, jadi disi mangalus do mora, natutu na peto do kobaron daganak na, tutu napeto do mambege jamitana ama margodang jana marlomo ni roha.
Satorusna, di ari nasolpui madung ami lagutkon do sudena kahanggi nami namarsisolkot. Ami jamitahon di ibana satontang hata ni danak na tarsangkut tu jagar-jagar ni mora di Pidoli Lombang sanga na turut di ibana magodang dohot marlomo ni roha, disi mudah-mudahan sude kahanggi namar sisolkot turut do margodang marlomo ni roha.
Disi marpokati do hami namarkahanggi marsisolkot, dibaen hita namarkahanggi dopeon namargodang ni roha, ita undang ma jolo ula-ulanta satorusna mora dohot anak borunta, sanga turut do ibana margodang dohot marlomo ni roha.
Putus ni tali dohot pokat nami namarkahanggi marsisolkot ima di ari namanyogoti, idalankon hata tangking tu homu koum-koum namion sasudena anso marlagut tu tugas nami on onma diborngin ni arion. Mudah-mudahan naso marhalangan madung hadir dibagas namion.
Onpe, hombang ni burangir nami mangadopkon sude ula kahanggi mora dohot anak boru. Satorusna hatobangon dohot na dipatobang iring dohot hatana. Namanjamitaon na ma ami di homuan sasudena bahaso anak nami si Dalkit madung manyangkutkon hatana tu jagar-jagar ni mora di Pidolo Lombang, jadi onpe marsapa ami di homuon sasudena sanga na turut do roai homuon margodang dohot marlomo ni roha, muda na turut do ningkomu ami manyambut margodang ni roha, tai muda ngada ningkomu turut, ami manjalang tahi dohot pokat sanga songondia dalan panamana.
Botima jolo hata sian suhut baen dison do kahanggi daohot anak boru nami, ibana ma patama patupa hataon, usudahi ma dohot assalamu’ alaikum warohmatullohi wabarokatuh
Comments
Komentar Anda