Novel Mandailing

Nanisuratkon : Dahlan Batubara

Tar pukul 12 marayak kotu Luhur, parobanan ni mait ma ostang i jolo bagas i. Alak najaji pe madung rongom i alaman i. Si Poso totop do i lambung  ni Muklan. Si Pikek i bagas paombar-ombar jugukanna dohot inang nia. Ngada sajia onok, opat alak kahanggi dohot anakboru paijur jenazah mandiang Imran tingon pantar tonga bagas i tu jolo ni bagas i, ima tu parobanan ni mait i.

Alak najaji mur marongom i jolo bagas i mangadopkon parobanan ni mait i, ima nangkan pabuot mandiang Imran nangkan ioban tu masojid manyumbayangkonna dompak so ipataru tu parkutahan.

Sian barisan ni kahanggi, Muklan ma mangobarkon i adopan ni alak najaji i satontang najumolona mandiang Imran. Tingion na marsituhuk, maroban tu mantari, naipaubatkon tu ruma sakit, soni muse na mardatu kampung.

“Tai sonima gorit ni anak nami on, udan naso asauangan-masursur tano parsidegean-magotap tali parsigantungan, muda maruntus mada langit-inda na tartungkol jari-jari. Ubat do na lalu tai ajal ngada tarambatan. Ima i pukul 4 marayak kotu Subuh i ma na ibolus ni anak nami, ima namangadop tu Allah subhana wata’ala dohot ucapan inna lillahi wa inna ilaihi rozi’un,” ning Mulkan.

“Sapaninggal ni anak nami on, les ami suru do naipas langka tu jae dohot tu julu, tu koum nami, mora soni anakboru, soni muse tu uta balian mandokon satontang siluluton ima anak namion na madung jumolo,” ning Muklan patorus obar kobarna.

Nagada lupa Muklan mandokon hata sobar-sobar tu alak sabagas na itadingkon ni mandiang Imran. Soni muse mangobarkon partalian ni utangna, sadari i ma iagohon utang ni mandiang i, harana alai kahanggi dohot alak sabagas ni mandiang i doma nangkan manggarar utang na itadingon ni mandiang Imran.

Dung sidung kahanggi mangobarkon hata-hata, ipatorus tuan guru i ma mangobarkon tu alak najaji, ima satontang mangido izin, mangido kamohopan ni alak najaji pala nga sabinoto adong kasalahan sanga pe obar naso tama na unjung tardokon mandiang Imran dompak mangolu.

“Imohopkon do roai?,” ning tuan guru i.

“Ami mohopkon..!!!,’ ning alak najaji i.

“Dungi, nga sanga binoto, i ari udan talpok-talpok mandiangon tu bulung pisang mambaen saung-saung, sanga tartalpok ibana bulung gadung, tai ngada pe sompat ibana mangido izin tu  koum nami, tarmohopkon do roai on..?”

“Ami mohopkon,” ning alak najaji i.

 “Alak na mar iman do roai on…?”

“Mar iman…!!!”.

“Alak na Islam do roai on..?”

“Islam..!!!”.

“Alak naparsumbayang do roai on..?”.

“Parsumbayang…!!!”.

“Alak nadenggan do roai on…?”.

“Nadenggan…!!!,” ning alak najaji i.

“Tarimokasi ma atas kesaksian ni koum-koum namion na madung manyaksihi namaninggal on,” ning tuan guru. Sidung i, ipalalusa ma mandoa, ima namandoaon mandiang Imran dompak so ioban tu masojid.

Tangis manggangguk Si Siti ngada tartahan, soni muse si Pikek namanggagguk mangiligi parobanan mait ni amangna na iporsan poso-poso i manadingkon alaman ni bagas i.

“Nakehe ma langa ho aya ucok…!!!!,” ning Siti marnoli-noli mangangguk salaos mangaluk boruna. Ngada ibotosa sanga songonjia be, ima na ona tadingkon ni alaklaina, ima namanadingkon daganak na markalomatan, ima namangadop tu tuhanna. Ngada adong be parsuoan, ngada unjung be tarida, ngada be unjung muli, na kehe saonokna, marsarak naso unjung-njung be marsuo.

Si Poso nanitogu amangtuana Muklan mangalo i jolo ni parobanan ni mait i, na iudurkon alak najaji, namaroban mandiang amangna tu masojid. Maroban mait ni amangna mangadop tuhan.

Luas Luhur, dung sidung isumbayangkon, ipalalu ma maroban mandiang Imran tu parkutahan, igananna, ima ibagasan ni tano. Ngada be muli tu ginjang ni portibi on, marsarak dohot dadaboru daganakna, na isarak dua banua. Parsarakan saonokna. (marsambung)

Comments

Komentar Anda