![Marsidao dao cover](https://i0.wp.com/www.mandailingonline.com/wp-content/uploads/2016/02/Marsidao-dao.jpg?resize=450%2C256)
Novel Mandailing
Naisuratkon : Dahlan Batubara
Sonima arasoki ni na tingon tobat i, arop mandapoti do halak bope namarsoluk-soluk tingon manyogot ni ari santak tu arian. Soni muse pala borngin ni ari les dodas do adong arasokina, ima halak namarsulu. I longko-longko ni tobat i asa pe longko na ilambung pambulu nai ma marlagut gulaen nai i borngin ni ari, mari-ari muse pala adong bondar kalihirna mur mabahat ma gulaen natading.
Ima nagiot suluon ni ama-ama na onom halak i. Muda tar bahat tobat namangarsik, hum bahat ma somalna gualen nadapot, angke ra do santak tu pukul 1 sanga pukul 3 maraek manyogot somalna halak pala kehe marsulu.
Tolu lampu taromak ioban halai nakehe marsulu i, tolu gadubang nalanjang songon podang tompana, tai inda podang ba, ima nadodas ioban halak marsulu. Tai anggo nabolit i ak ni halai adong do kibungbe ima gadubang napondok. Ganan ni gulaen adong namaroban baul-baul, adong namaroban tamburan. Somalna na kehe marsulu, dua halak ma sada lampu taromak. Sada halak maniop taromak boti maniop lading panampul gulaen, dungi sada halak maroban ganan ni gulaen.
Si Imran dohot Si Basiron salampu, Si Imran ma maroban lampu taromak, oni Si Basiron maniop ganan. Si Totop dohot Si Lagut salampu. Si Koddis dohot Si Mahmud muse sadongan. Udur-udur ma halai mamolus gadu saba maroban sak-sak ni lampu na torang, nangkan manjalahi gulaen i borngin ni ari ima mambaen guleon tu bagasna be, harana ngada na pupu tartabusi be gulaen songonon masona, maso ni dompak parsuadahan boti pardangolan halak sahuta.
I tobat na parjolo dapot i saba na i huta Adian Jior i ma halai so na laoi. Tobatna tarbolak, adong do tar sabunbun bolakna na madung marsik. Natuari dope dung iarsik partobati. Longko ni tontang pambulu nai pe tar bolak.
“Tarmiduk do uida,” ning Si Koddis laos mamanat-manati gulaen i longko ni tobat i.
“Anggo songoni, homu ma ison mijur, ami tu jae ma ami palalu,” ning Si Totop mandok tu Si Koddis dohot Si Mahmud.
“Bolas ma, pala ngada marsuo ita naron, tu saba nailambung ni partanobataanan ma hita marsipaintean,” ning Si Koddis sareto marsiolohon ma halai sude.
Mijur ma Si Koddis dohot Si Mahmud tu tobat i. Na opat halak nai palalu pardalanan tu jae. Tar tolu saba tingon i mujir muse ma Si Imran dohot Si Basiron ima tu tobat namarsik manyogoti. Si Totop dohot Si Lagut mamegol halai tu lombang, tar lima saba tarida muse ma torang ni lampu ni halai mijur tu sada tobat.
Juuppp…sora lading Si Koddis manampul aruting. Dung itampul ia, ipajokkon ia ladingi tar saeto tingon panampulan i, dungi iahap ia dohot tangan siamun nia panampulan i, tangan siambirang nia totop manjing-jing lampu taromak. Aruting tar sabatu senter godang na madung arbing-arbing iela ia tingon panampulan i sareto isurduhon ia tu baul-baul na ipatongon Si Mahmud.
“Isi muse bo,” ning Si Mahmud sareto manudu tu siambirang Si Koddis. Dung ipatongon ia lampu taromak i laos itampul ia ma. Aruting muse hum godang tingon naparjoloi.
Erer-erer boti asok-asok do alai namangalangkahon pat ni halai so ulang saru malkot longko ni tobat i boti so ulang tarsonggot gulaen na adong. Harana muda malkot do aek nai ngada tarida be gulaen, bope na ipadonok taromak totop mei ngada tarida. Si Mahmud antong totop ma i pudi ni Si Koddis tiop-tiop gananna sareto pupu mamanat-manati tu siamun dohot tu siambirang Si Koddis, harana bope ijolo ngada manombo sude tarida Si Koddis gulaen i, les adong dei nasihil sian panaili ni ia.
Borngin mur mangali tandona madung tar pukul 2. Sora ni tuouk boti urindik terbege marsitune-tunean sian gadu-gadu ni saba. Iligi tu jae boti tu julu songoni tu dolok dohot tu lombang na golap do tarida, bona-bona ni arambir soni muse kueni asape bona ni jior taru na lomlom doma sude, ambubu ni suan-suanan i maia na tarida pangolat ni nagolap dohot rata ni langit naipatorang ni bintang-bintang.
Tarida i Si Imran dua halak tar dao i lombangan mamolus gadu saba namanjing-jing lampu taromak. Pala ngada alak si Koddis, anta alak Si Totop mei, ning roa nia. Baul-baul na itiop nia madung tar borat, harana tar miduk ma gulaen dapot ia dohot Si Basiron. (marsambung)
Comments
Komentar Anda