SI RARA
- account_circle Dahlan Batubara (Redaksi)
- calendar_month Jumat, 19 Jul 2013
- print Cetak
I tandai homu dope le Si Rara? Ninna, najolo ompung ni ompungnia alak naro juo dei sian Aek Nabara, ro alai sabara mamota-mota arangan dohot rura sampe tu paya-paya na ilambung ni Gunungtua. Dung tolap tu Huta Sabariba, nida alai mada sada amporik Ambaroba atia martata-tata paida-ida ulok Sa manolon Si Bodak na mata, sangkot di ola-olana, oni pangkosana tangging marsada-sada, nga bisana be muta. Kasidunganna baya, bilak mata ni ulok Sa i aduana.
Ro ning uluan ni alai i ma Raja Gaja: i son ma ita pungka huta! Botimada, lolot-lolot jolma pe murmartamba, adong muse saba dohot rurana, sian dolok torus tu lombang, i jae bope i julu mang rarak jolma. Mang singkop mada sudena muda na giot mambaen sada banua. Putus pokat ni alai sudena binaen ma goarna: Huta Galagala, arana di si jaji tubu batang ni galagala. Songon i mada indokon, di na rinca di na robi baya, antargan di na tolbak di abornginanna, antargan di galagala na markaombu di sarumpaet na lobat bunga, oloda Dja Tulila.
Dung do alai marratus taon mian di Huta Galagala, na dangolna baya inda bahat na maruba, angoluan ni alai leng na sian kobun dohot saba, bope baya madung lolot jongjong di si sikola. Natuari sada, burangkit mada ama ni si Rara patunda ponten parsiajaran sikolana sudena na rara, mandang kulluhum angko lima, marosros doma ate-atenia paida-idana. Aso do ra songon i langa? Marsapa amangnia tu “Na So Nida”. Tar sasampak jala adongma obar na alibos ibagasan roana: “mago Poda Na Lima !!!”
Dung i marsurak simatobangnia: “Marmaraaaaa … !!!”
(Edi Nasution)
- Penulis: Dahlan Batubara (Redaksi)
