PARIPURNA DEWAN RAKYAT

Hanya Fiksi, tapi boleh dipikirkan:

Muloi manyogoti, ranggo dope ari, namargoso ma barisan ni Anak Boru Dewan Rakyat (Sekretariat DPRD) mardahan di alaman. Alaima barisan namanorjak tu pudi juljul tu jolo, sitamba naurang siorus nalobi, na ganop ari sitastas nambur manjuljulkon morana. Di ari on ma nangkan dipatidahon abisukan ni halak Mandailing, songon sindok ni alak, adong ninna tolu apantunon: somba marmora, elek maranak boru dohot manta-manat markahanggi.

Harani i, adong ma na mamasu uali, adong na mangkorot pisang siolot, adong napamilas aek, adong muse antong na paombang amak di Sopo Godang Partahian (Ruang Paripurna). Angke, tolu ari nalewat madung kehe marpungu mandohoni tu bagas-bagas ni Dewan Rakyat (anggota DPRD), ima taringot ni Partahian Godang (sidang paripurna) nadung ditontuhon wakatu dot katikona, ima di ari Orbaha sadarion.

Di laos kotu ni ari i, marroanma sude barisan ni Dewan Rakyat, soni muse Raja Panusunan Bulung (Bupati). Marjugukan ma di amak nadung dihombang sakuliang ni Sopo Godang Partahian, songon parjuguk ni Patih Gajah Mada doma tarida.

Di Barison jolo tarpaidama Amanta si tiop uhum, Katua Dewan Rakyat, diapit dua anggotana atir kamun. Ibana ma na manontuhon uhum nangkan sitiopon ni raja. Amanta Bupati juguk disabola nai, salaos mambalun pusuk imbako tali nangon Lumbandolok. Taru namuap imbako doma sude, hukkek doma amanta Katua Dewan Rakyat.

“Ala, mangido mohof da, Pareban,” ning amanta Bupati mangalus. “Nasongat dabo uap ni timbako na ngon jae on.”
“Olo, nga manguai, Rebani,” au pe tai nasuldop do pusukku. “Tai inda tartarik boto idupon muyui, inda tahan ilala indorai. Ima so lek timbako gayor on soni diau,” ning Katua Dewan mangalus. “Taringotna, Reban, piga do Uhum (ranperda) nagiot siseon ta sadarion.”
“Tai sambilan, Katua.”

“Bo nabahat tong, pala ngadong manombo sasataon.”
“Ah, ulang dokon komu soni, Reban. Ibege rakyat non ila roa. Mangarti ma homu, taru inda tarjama dabo sude karejoi. Ngape manyabi di saba jae, mamuro muse ma di saba julu. Anggo angkang muyu di bagas, hum bayuon nia nga lobas ia. Dor na pandasoran, naso unjung dope mambibir.”
“Hahaha, nangkon be marsicaritoan kita, Reban. Aropku ita pangkal ma tahinta on, so ipas salose. Na giot ke dope boto tu Huta Julu, adong muse ninna warga di si na madabu maragat.”

“Olo, bana mai, Reban. Aupe na ke muse ma on tu Sinonoan. Adong ninna muse disi na so ra mambayar balasting (pajak),” ning amanta Bupati. “Olo, anggo naso tarbayar tong idokon do gari, so ita santuni ngon Dewan Zakat Daerah.”
“Imada, Reban. Aropku ita muloi ma. Adope Anakboru Tobang (Sekwan) pangkal komu le.”
Bulus orngak amanta Anakboru Tobang.

“Jadima ma da, Katua, Mora nami.” Margeser ibana saeto tu jolo salaos mangkuling, “Pade ma roai ami surdu burangir on mora nami?” Ninna tu Katua Dewan Rakyat. “Aropku da ngada be sala. Harana madung dison do amanta namora Natoras,” ning Katua Dewan mangalus salaos mangaligi Bupati.

Bulus marunduk-unduk ma Anakboru Tobang (Sekwan) manyurduhon burangir tu Katua Dewan Rakyat, Bupati, dohot sude anggota Dewan Rakyat. Iurma di pudi ni ibana Anakboru Parsontingan (Kabag Umum). Salose manyurdu burangir, bulus ni tokok Katua Dewan ma gondang etek tolu hali.
“Santabi tu Amanta Bupati,” ning Katuai. “Taringot di partahianta di ari sadari on, ima taringot patik-patik ni uhum (Ranperda) nadung dilehen ni ibana di ari nasolpui, dohot nadung dipokatkon dongan-dongan di Bagian Uhum (Badan Legislasi), isonma ita sannari marlapang ni roha patigorkon sasudena, anso dapot ma gari manamba hasangapon di hita halak Mandailing. Bisa ma ruai ita patorus pokat taon?”
“Olo, katua nami,” ningna mangalus alak na rami.

“Mauliate ma koum nami sasudena. Aropku deges ma ita sombahon tu Amanta Bupati anso ibana pasampe makasud na, aha sajo do naporlu patigoranta taringot ni patik-patik ni uhum nadung disusun ni ibana di ari nalewat. Ja soni do koum nami?” Ning Katua Dewan mangadop alak na rami.

“Bana mai Katua nami,” ningna halak mangalus.
“Boti mada.”
Ipatujolo amanta Bupati parjugukna salaos mangkuling, “Imada, sian narobi pe madung tarbonggal do hita Mandailing halak na bisuk marpoda marsipagodangan, nagomos markoum marhagabean, dohot na marsiurupan naso marsipadiaran. Di son madung hami susun sada patik-patik ni uhum paradaton, ima na margoar “Uhum Parbisukan.” Di uhum on, ah, aropku hum padema rap ita sise naron. Adope, bagion komu jolo,” ninna manyuru tu barisan ni Anak Boru Tobang (Sekwan).

Bulus jonjong ma Anak Baro Tobang dohot barisanna, songon paninjal ni landuk. Bulusma di bagihon kitob Patik-Patik “Uhum Parbisukon” tu sude barisan ni Dewan.

“Santabi jolo, Katua,” ning sada anggota Dewan na ngon Partai Hayuara Parlaungan. “Aropku da, Katua. Tumabo ma hita bagihon inumon kopi, so hum tabo ma nian na manyise kitob on.”
Bulus iligi Katua Dewan ma Anak Boru Tobang. Marlojong muse ma Kapala Anak Boru Parsontingan (Kabag Umum) dohot barisanna salaos mambagion parbasuan dohot mangkuk orja. Ro muse ma na maroban ceret dohot aek ni ngiro. Adong namaroban sasagun, adong muse na maroban mangkuk panijuran ni burangir.

“Tamba jolo pining naon, Anak Boru nami,” ning sada anggota Dewan nangon Partai Orbo Badar. Homang sekwan. Na lupa do ibana pabuotkon pining. Sontang pe nahabis do tolu ari na lewat. Ngada adong be marjagal sontang patunda ni musim nonat. Jonjong bulus Katua STAIM, bulus irungkar ibana pining salaos disurduhon.
Mikim bulus halak na rami. Hukkek doma amanta Bupati mangidasa. “Aropku dung luhur doma ita patorus dabo pokat taon. Sumbayang luhur ma jolo. Ja soni do, Amanta?” Ning Katua Dewan tu Bupati.

“Anggo au da sude pade do ulala. Baen bahat dontong koum-koum ta pe na marroan sian huta bariba, aropku lek na ita oncot jolo manginum kopi.”
“Imada, tutu madai,” ning Katua.
“Tu koum-koum nami sasudena, baen adong dontong ninna indahan nai pamilas ni Anak Borunta, aropku humpade ma hita parrasokion jolo. Dung kotu luhur doma naron ita patorus partahian ta on. Sondia do koum nami?”
“Tutu madai, Katua nami.”
Bulus ditokok katua ma etek sahali. “Boti mada, naron ma ita palalu,” ninna bulus.
Marjonjongan ma jolma mangadop tu dapur. Marsibuot indahan tungkusna. Gule pisang siolot dohot lompap nai tutung, adong muse lasiak porngasna. Ro muse barisan ni alak nabariba tangan, anak yatim, sude jolma namale tola do mambuat indahan di alaman ni Gedung Rakyat. Namenek nagodang, naposo na tobang pamatang, atir kamun mangan marjugukan di porlak parsanggulan Bagas Rakyat. Ima na didok songon siala sampagul, rap tu ginjang rap tu toru, mula madabu rap margulu.

“Santabi jolo Amanta Bupati, janami,” ning sada bayo ihur bodatna. Ida ia alak mangan, dibuat ia muse bagian ni bodat nia.
“Olo, kahanggi,” ning amanta Bupati. “Songon na siak boto gule ni anak borunta on sakalion.”
“Goarna pe orja marrami-rami, Reban,” ning amanta Katua Dewan. “Na mocom tangan mai manjamana.”
“Olo tele,” ning amanta Katua Dewan salaos mamorgas lasiak.(hol)