MARSIDAO-DAO (episode 7)

Marsidao dao cover

Novel Mandailing

Naisuratkon : Dahlan Batubara

Apea na tingon Mandailing pe inda sarupo dohot apea na tingon Siantar. Harana apea na tingon Mandailing antong apea seling do bahatan, ngada sadia bahat apea kulasi, pala na tingon Siantar apea kulasi bahatan. Hum deges do gota ni apea seling umpado gota ni kulasi, harana gota ni apea seling hum jontal pala madung do kontal. Pala gota ni kulasi inda songonjia jontalna, les nadayuk soni.

Ibaen bahatan do halak mangguris i luat Mandailing, ima so maronahan do halak nabahat ibaensa. Dompak godang tuor ni apea, mur madeges ma angoluan i luat Mandailing, soni muse pala mura nangkan markoletan ma halak nabahat, bope sipangguris soni muse nasihil dohot do managrasoi akoletan. Songon parmotor tambang antong na urak do alak manaek motor iaben parsuadahan i, songoni muse siparjagal ngada muse sadia targadis jagal ni alai. Pala saro Indonesiana “berdampak kepada semua sektor” ningna.

“Iamada, Mamak, arorongkon pe ngada sanga maua, nagiot maroban epeng panggarar naisolang ma goarna ning Mamak,” ning Si Imran.

“Alabaya, Bere. Tubagas homu sugari ro naron borngin so ulang sabat komu ibaensa”.

“Ngada nasampot aropku naron borngin, Mamak. Harana nagiot kehe marsulu gulaen pala ngada suada halanganna naron borngin, ima so araian on doma batas au manopotkon Mamak”.

“Bo, soni do langa, Bere. Dungi madung adong ma langa tarsongon natarpalagut muyu, Bere.”

“Soni mada, Mamak. Adongma alhamdulillah na tarpalagut, tai ngada dope gonop sude. Ima so ro au marobansa salaos mamokatisa dohot Mamak sanga tama ma uoban na madung tarpalagut on”.

“Olo mada, Bere. Angke sude do hita dompak markoletan. Mamak pe sapetona ngada pade ilala manyunggulsa, tai sonima goarna, roa do naso ra, tai kaporluan muse do manyosaksa.”

“Imada, Mamak. Nauoban bahatna onom ratus lima pulu ribu, sonjia do ning roa ni Mamak. Sapetona adong do sere na ami pajopi, pala igadis deba dapot do panggonipina so tuk sajuta lima ratus. Dungi boru ni Mamak pe madung olo do iabana pala igadis serei”.

“Ngada pola daboi, Bere. Naioban muyu i ma soni jolo, sanga andigan muse doma dabo Bere deba nai. Satontang serei, aropku angkon nasantak kolet ma soni ulala so ro mamak mandokonsa. Harana ulang sugari itapor sere na madung hibul”.

“Anggo songoni mauliate sagodang-godangna tu Mamak namadung mengelehen alapangan tu ami. Jaru pe soni totop do ami pasimbah deba-deba ni pandapotan palagutsa nangkan panggarar parsolangan tu Mamak,” ning Si Imran sareto mambuot epeng tingon cakuk nia na ibalun pake palastik, ilehen ia tu Si Muklan.

***

I borngin nia ari marayak pukul 8 dung sumbayang Isya, lagut ma ama-ama onom halak nangkan nagiot kehe marsulu gulaen ima na tu saba balian ni huta, ima i huta Adian Jior nabahat tobatna. Maso on dompak bahat alak partobat namangarsik.

Dung do margulaen alak partobati manyogot mengela gulaen ihan mas, les adong do martinggalan garumusna i tobat i. Dodasna bayo partobat i ngada sajia ibuotsa garumus nai, halak sabagasna boti koum sisolkot doma namandurung boti namandehena ambaen saleon sanga asompodeon.

Somalna bahat do garumus ni tobat i huta-huta jae, songon huta Adian Jior, Gunung Manaon, Saba Jambu, Pagaran Tonga, Manyabar dohot Gunung Barani. Aruting, tingkalang, aporas, nila, capet, bolut dohot piri-piri ma somalna garumusna.

Muda dung mantak alak sabagas boti koum sisolkotna namanangkup garumus i, dodasna ngada sude gulaen garumus i tarela sian tobat i. Bahat dope aruting, tingkalang dohot piri-piri soni muse nila namananom i bustak nadayuk i. Dung tar milas ari, marmungkapan ma mulak tingon bustak i. Somalana arasoki ni daganak-daganak na madung muli sikola doma mambuot garumus namananom i. Harana pala tarbonggal tu daganak-daganak adong partobat namangarsik, merkehean ma alai dung muli sikola tu tobat namangarsikan. (marsambung)