Novel Mandailing

Nanisuratkon : Dahlan Batubara

Luas sumbayang Isya, mangalao Si Siti tu tapian ompa ayanna ganan ni parabiton nangkan sap-sapon. Ngada adong alapangan nia be manyapsap arian, harana sogot ni ari nangkan kehe ma marsidao-dao santak tu kotu Magorib.

Pala ipasapsapkon tu Si Pikek, ngada sada roa. Angke ngada pe malo manyap-sap ias, mari-ari sogot ni ari paridi anggina dompak so kehe tu sikola; muli sikola parorot anggina; potang-potang kehe muse sikola maktab; muli sikola maktab nangkan mardahan muse salaos paridi anggina ni potang ni ari.

Sonima ganop ari sannari Si Siti dung do jumolao amang ni dagankna. Um na modom doma maradianna, modom sian pukul 10 borngin tu pukul 4 manyogot. Itonga jari-jari ni pat nia pe manombo pupu do gumatal ibaen na pupu rondam i tonga saba. Pel erba ma dohot miak manis iapuskonna pangubatina.

Dapot ari manyabi, ngada kehe ia marsidao-dao. Sadari manyabi maroban alak na mangomo harana ngada natarsabi pala sada alak. Ancogot nai mangarobot boti mamiari dohot pompa angin. Potang ni ari pamuli eme tu huta, nanitaru ni alak naposo-poso na gogo marboban.

Tarpalgutsa do 74 belek sian saba i. Dung iela parbolaan tu nampuna saba, tadingma ji sia 45 belek. Sian na 45 belek i, itaraonna 21 belek ambaen kangaron, lobi nai igadisna tu pamuge eme i huta i.

Sadari i, mangkangar eme do ia i banjar nabolak i. Unjur-unjur amparan pangkangaran i lanjang ombang nanipararak eme iginjang nai so iang ikangar las ni mataniari. Si Rahim ianggun-anggunsa i sopo i sareto pupu taili matana tu eme nanikangar i ulang jabat marroan manuk manuduki.

Muli tingon sikola, dung sidung mangan i bagas, na tu pangkangaran i ma ro si Pikek dohot Si Poso mandongani inangna i sopo i.

Potang ni ari ma idaek jombur i, harana madung pir burir ni emena. Inangna manaruna tingon pangkangaran i tu bagas. Si Poso maroban 2 karung tu losung an nangkan iduda ni parlosung i so tading dahanon.

Marayak kotu magorib ma parlosung i sidung mandudana. Sian na dua karung i tarpalagut dua partolu karung bahat ni dahanon, ima ioban Si Poso tu bagas ni alai.

Borngin ni ari, ietongsa epeng ni eme, dungi ipajopisa i bagasan balunan ni amparan na ortang i pagu. Ancogot ma ningroana maroban epeng i tu poken nangkan itabuskon tu sere so ulang matapor epeng na impal.

“Ita tabuskon ma tu sere ancogot, harana pala ngadong epengta ari rayo on, ima ita baen panabusi baju baru muyu dohot panabusi bante i poken bante on,” ningia tu pompar nia.

“Giot ari rayo ma langa ita, Umak,” ning Si Siti.

“Sabulan nai puaso ma ita,” ningia.

“Au solop soallo ma soni dabo ari rayo on solopku, nangkon solop nagodang arga,” ning Si Poso.

“Aso, Amang,” ningia.

“Bo, so ulang bahat epengta kehe, Umak,” ning Si Poso.

“Inda maila ho langa mar solop soallo ari rayo,” ning si Pikek tu angkangna.

“Tai, ngadong ayah be, soni dei dabo pala ita madung anak yatim, ulang mewah-mewah bei,” ning Si Poso.

Munduk inangna mambege obar ni pomparna. Maraek matana maribo ni roana tu daganakna, na markalomatan na mamolus gorit ni ngoluna naso maramang.

“Pala tuk epengta, bope solop na deges i itabusan. Pala inda tuk ma sobaru solop soallo itabusan. Rap mandoa ma ita so tuk epengta da, Amang,” ningia tu pomparna.

“Olo, Umak,” ning Si Poso sareto ipagulungsa tu bantal i. (marsambung)

Comments

Komentar Anda