Balun Balun Bide Ningna Boto Caritoi
- account_circle Dahlan Batubara (Redaksi)
- calendar_month Sabtu, 9 Jul 2011
- print Cetak
Salolot naon ning jabulele balun amakmu ningnado istilahna, anggo dungro amantai madung maruba, balun-balun bide doma boto, balun sambalu nai marompot potangko ari, ningna ma carito nia salaos manyirup kopi di lopo sijabolboli, salos ibuatia antong sigaeret panama, bope idokon dongan sigaret panggirik-girik ni supping anggo jabulele halakna anggo salain sigaert panama emmajolo.
Madung maincatdo ubege parmainani angkang ibarat ni namardikir madung mainma pacuk kuda inda natanggung-tanggungbe caritona, diado natudia angkang pala jabat balun-balun bide namur matangkang doboto ubegei ning sutan mangkahap antong mangalus.
Maksudna inda umna mambalun amakbe balun-balun bide doma arana madung marbalun-balun songon amak nai sarat ni ambeng randuk, songonimada parmainani, sangajo namur matngkangdo inda naalang-alang dabo arorona ning jabulele muse antong mangalus.
Tangkas dabo angkang paboa ahado natarjadi ulang hata-hata antusan, arana bahat naron dongan naso mangarti, bo sala carito sego doboto nadenggan, ahanai anso idokon angkang balun-balun bide, namaol doboto balunon bide narado hodokan gurung-gurungi ning sutan mangkahap manguduti caritoi.
Songon namambal;un bide ibaen amantai marbalun-balun inda natanggung-tanggung anggo naso kuat-kuat iman ni sada-sada halaki narado manggomak-gomak palakpak, iambang na hona suga hapengani na pangimbol-bolondo rupana ning jabulele ekel-ekel adop tingkapi.
Anggo jabat songon namambalun bide boto pamassang ni amantai margoso-goso doboto pambaen nii mapenpen dei boto gas-gas poso, anggo jabat songoni parmainani madung tangkang ni natangkang mei, ulangbe adong namangalap-alapi sangantong songon singgip naurang onyak, angke pala ipikir-pikir salolot naon nakacak-kacak mada ilala dongan-dongani, sapala nasurpungdoma irampingkon amantai inda sompat manjalai parsitiopan ning sutan mangkahap muse mantong mangholas-holasi.
Anggo donganta nalele pamatangi boto dung ona rampingkon naso mungkap-mungkapbe, ningna caritoi namargopak-gopak do dibagas marpupu rurus aek ni mata, angke salolot naon iambangia do naadong katua saumur hidup, beteng ilala ia, gak-gak panaili nia, sapala ro amanta naso manganggo olbung ibalunia lanom songon namambalun bide ning jabulele muse marpupu mangutur-utur tot.***
- Penulis: Dahlan Batubara (Redaksi)
