Marbue-Bue Disopo Saba

Maso-maso nadung salpu pala langkama damang dohot dainang tuparusahon ima tusaba balik sanga tu saba bariba, atope tu saba jambu, ipaturema anggunan ni danak di sopo pantar gogat, marbue-buema simatobangna dadaboru papodom-podom danak anso bisa harejo marbabo eme sangape mangarabi duru.
Indaba songon saro sannari papodom-podom danak logu-logu na mardorung-dorung naso tangiononkondo baen roncamna, manombo logu-logu India naso binoto artina, arana inda adong antong namangrti bahasa Hindustan, sanga nagorar nisimatobang nibape naidokonnai, inda nabinoto beibe.
Inangna marbue-bue amangna gulung musema dipantar gogati, mongama sugari ipajolo amangnai karejo, pala dung modom danak baru ro inangna tutonga sabai, halaklai onpe dabo manombo inda mangarti iba jiba ningroa ni inangnai antong, anggo manggoraonna indabarani ia, mabiaria itojankon bayo sanga dopeng tangan siambirangi.
Anggo napade dabo angkang majolo pardongan sibutet disopoon anso kehe au parjolo kareje, pala dung modom ia naron baru roma ntong angkang ning dadaborui mangelek. Indasongoni bue-buema sibutet, arana aupe nasangat sonangna ulala pabege-bege bue-buemu, mangantor jabat ulala tu ate-atei ben malonaho namarbue-bue, ning amang nidanak mngalus laos ibuatia abit buruk amben bantal nia di pantar gogati.
Marbu-buema inang nidanak, narap modomma anak dohot amangna. angke amangnai pe antong naparlosokando karejo, nabulus doherdo ungkor nia pala ipagelengia manyoding, jooooodabo mang ni pomparku, manyiak-nyiak baya ate-ateon ning inang ni danak antong laos jong-jong mambuat sasabi rambas dung modom anakna dohot amangna iginjang pantar gogat nisopoi.Tarsongononma pantun bue-bue ni inang ni danak papodom-podom pinomparna disopo saba,
modom maho inang modom arian
ulangbe inang lalat manindo-nindo
dibue-bue ho inang diparusahoan
modom maho anso kehe dainang harejo
modomho inang sannari
ngot naron dikotu zuhur
ulangbe inang lalat margiri-giri
mungkorma dobur-dobur
magodangho inang tibu
anso adong tamba nigogo
anggo ami simatobangmu
badannape hurangma margogo
muda magodang ho sangandigan
marsikolama manjalai bisuk dohot poda
ita tabusima diho gonjong dohot golang
ipasikola maho inang tusikola agama
dianggunho amang dibue-bue
nadinggun disopo saba
Sonang janalomo inang ate-ate
Muda bisukho inang sanga basa
Mabang inang haluang
Nasonggop tu hayuara
Tibu maho inang magodang
Anso langka ho tusikola
Lancat inang marlangkitang
Apundung margiiring-giring
Tibuho inang magodang
Margincu marbadakma dung bujing-bujing***