MARSIDAO-DAO (episode 25)

Marsidao dao grafis

Novel Mandailing

Nanisuratkon : Dahlan Batubara

Si Pikek dohot Si Rahim doma donganna modom i bilik podoman i. Ipamanat-manatisa tompa ni pinomparna na ostang mungkor tando sinok ni modomna. Anggo ia ngada pe ra tarpodom, na pupu taringot tu mandiang alaklaina, amang ni daganakna, dompak mangolu namodom iambirang nia, tai sannari ngada be.

Si Poso modomna les totop  do i pantar tonga i.

Borngin ni ari mur maginjang, tai mata les ngada pe na tarpit-pitkonna. Ingotan ni Si Siti les mangaramang-ramangi. Ngada pe lamam iroana niparkehe ni alaklaina, ima na jumolo 5 ari na solpu, songon na pupu tarsonggot dope iroana parkehe ni amang ni pinomparna. Na kehe ngada be unjung muli.

Songon na tuari dope ilalasa mangecek-ecek dohot alaklai nia, songon na borngin tuari dope ilalasa sapodoman dohot alaklaina. Tarsunggul mulak tu na solpu dompak rap dohot alaklaina, na mangalao tingon Bilah manadingkon bona bulu, manadingkon amang dohot inang na kehe tu luat Mandailing manjalaki huta parmianan anso ulang binoto damang dainang ijia alai mianna. Harana, namarbagas i ia dohot alaklai nia ngada na iolohon amangna. Tolu poken dung marbagasi i, ngada sada roa nia dohot alaklaina, harana na pupu do iusaohon amang nia so itadingkon ia alaklai nia. Ima dalanna so mangalao alai tu luat Mandailing, luat na lobi dao tingon Bilah.

Iligi ia mulak tompa ni pinompar nia i dohot ilu na madung madabu. Daganak na bisuk-bisuk, pinompar nia tingon alaklai nia. Nangkan sada ia doma mamparkayaonsa, ngada be dohot alaklaina mamparkayaonna, ngada tarida alaklaina be simbur magodang ni pinomparna, ngada be taridasa angoluan ni daganakna.

“Pasada ma roamu, Abang. Uparkayaon do pinompar ta on salolot ni ngolungku. Nangkan pupu do uoban alai ziarah tu parkutahan mi, ubat ni lungun ni daganakmu, boti nangkan mangaji Yasin lehenon tu Abang,” ning roana sareto mangapus obuk ni daganakna.

“Pasada ma roa mu, Abang i sodun, nangkan upalalu do janji mi maroban daganak tu Bilah manandai ompungna doho bujingna, soni muse manandai amangtua na dohot bou-bouna. Ya Allah berilah kelapangan bagi suamiku di alam kubur, jauhkan dia dari siksa kubur, ya Allah, ya malik, ya rohman, ya rohim,” ning roana mambaen iluna mur marsaburan.

Borngin mur mainjang. Bulan i langit manyaksak. Inda sajia onok tarbege tarahim tingon masojid, ima na marayak kotu Subuh. Si Siti madung modom. Aek ni matana na madung oring les tarida gorit santak tu toru ni supingna.

Tar pukul 9 manyogot mangalao Si Siti tu saba. Aronduk ambit i abara siamun, Si Rahim ambit marparompa i abara siambirang. Alak si Poso dohot Si Pikek ma kehe do sogot ni ari i tu Sikola. Luas kotu Luhur doma muli na.

I sopo saba i, ianggunsa Si Rahim papodomna. Eme tarida madung marayak bibi, sada-sada bona ni eme madung aruar burirna, ima burir na poso. Amporik Sikodit mabang maroban duhut na oring nangkan mamben sarangna i alopa ni pining i gadu saba bariba jae.

Dung tarpodom si Rahim i anggunan i, laos gulung muse ma Si Siti. Ngada adong na giot jamaon nia i saba, na pasada roa maia. Harana luas kotu Luhur nangkan muli do ia.

Angin marombus dohot sora ni amporik na markucicit tingon bona-bona ni apas dohot jior mambenna tarpodom i sopo i. Ima angin ni saba na lumobi tagi ombusanna tu pamatangna, mambaensa sinok tarpodom. (marsambung)