MARSIDAO-DAO (episode 42)

Novel Mandailing

Nanisuratkon : Dahlan Batubara

Marsidao dao grafis

I jae ni dalan godang i, jongjog Si Isrot, Si Poso dohot si Pikek painte motor nangkan tenggeton ni alai tu Sidimpuan. Si Poso laing sandang do i abarana tas ganan ni pakeanna dohot pakean ni anggina. Soni muse si Isrot.

Ngada sajia onok, ro ma tarida motor Aek Mais mullop i tekongan ni dalan i. Iambeon Si Isrot tanganna pa so motor i.

“Tu Sidimpuan do ami, Ipar,” ning Isrot tu parmotor i, dung so motor i i jolo ni alai.

“Manaek ma hamu, Lae,” ning parmotor i. Parjolo do si Pikek manaek tu bagasan motor i, dungi ipaiut angkangna dohot Si Isrot.

Mardalan ma motor i dung juguk alai i bagasan. Tingon bagasan, ligi-ligi do Si Poso tu huta i nanitadingkon ni alai i, na manadingkon inangna na tading marsituhuk i bagas ni alai, na pupu mambatukkon mudar.

On, manaek motor ibana dohot anggina tu na dao, manjalaki ompungna tu huta naso unjung binoto sanga ijia luatna, sanga laing mangolu dope sanga songonjia. Maroban tondi ni inangna, na painteon ibagasna, anta adong dope roai parsuoan, ngada binoto, siparisna parsuoan ni paompuna dohot ompungna pe ngada maua be. Hum gonanan do adong naniligi ni mata, bope pinompar ni boruna maia. Pala adong arasokina, nangkan ioban daganakna mei ompungna tu inangna na madung marsarak mar bolastaon i.

Si Pikek pe na pupu do manaili tu ruar, angke ngada jot-jot ibana manaek motor tu na dao. Angke hum na i huta sajo do markusor ganop ari.

Angkon na pupu manukar motor do alai so tolap tu Bilah, angke ngada adong motor na tomtom dalananna tingon huta i tu Bilah, boti muse sian Panyabungan. Angkon na tu Sidimpuan ma jolo, ima i terminal Palopat. Tingon i, manaek motor na sihil muse do tu terminal Batu Nadua.

Sian Batu Nadua ma alai muse manaek motor tu Rantau Prapat. Tar pukul 3 ma alai tolapna tu Rantauprapat i.

Itiop Si Poso do tangan ni anggina na mangalao i terminal i mangihutkon alalao ni Si Isrot. Ulang jabat marsarak, ning roana. Angke na lumobi godang do tarida tu ibana kota Rantau Prapat i, boti jaji muse alak na paipaulu marbaju na lagak-lagak.

“Ita jalaki jolo parmanganan da, Amang. Mangan kita jolo, naso mangan kotu dope ita,”  ning Isrot.

“Olo, Udak,” ning Si Poso.

Inda sajia onok, tolap ma alai tu parjagalan indahan na adong i topi terminal i. Dung juguk alai i si, ipangido Si Isrot mangan tolu halak tu parjagal indahan i. Na tabo ma ilala si Poso dohot Si Pikek na mangan i, angke korotan ni gulaenna lumobi godang, ngada songon pangkorot ni inanngna pala panggule ihan laut i bagas ni alai.

Sidung mangan i, isapai Si Isrot tu parjagal indahan i sanga motor aha do na ontom dalananna tu Bilah. I tuduhon parjagal i opat motor na lagut tar i siambirang terminal i.

“Itu yang di sana itu mobilnya, Nak,” ning parjagal i sareto manyapai sanga tu huta jia do topoton Si Isrot.

“Nama kampungnya Bilah, Bu. Kami pun baru kali ini ke sana. Saya bawa anak-anak ini mencari neneknya. Ibu anak-anak ini sakit keras di kampung kami, Bu. Ayah mereka sudah tiada,” ning Si Isrot.

“Oh, ibu kenalnya kampung itu. Nanti bilang sama sopirnya kalian turun di kampung itu. Kampung itu di pinggir jalan itu letaknya. Kira-kira 3 kilo sebelum dapat Negeri Lama,” ning parjagal i.

Sidung i, mangalo ma alai tu motor nanidok ni parjagal i. Na nialo-alo par terminal i do alai,  manyapai sanga tu jia alai. Idokon Si Isrot goar ni huta topotonna. Na ontom muse do parbana ni motor i.

Dompak so mardalan motor i, idokon Si Isrot gorar ni huta nangkan parturunan ni alai tu paroban ni motor i. Idokonsa naso ibotosa sanga ijia huta Bilah i, ima so parmotor i doma pa so motor i pala madung tolap tu huta Bilah. (marsambung)