Marpenong-Penong Jolma Nalenong

Zaman sannarion bahatmada jolma nalupa tu ajaran ni ompunta naparjolo sunduti dohot ajaranni ugamonta nasalalu ituturkon guru, harani bahat namarpenong-penong songon namabahattu mangan pining nacapot, hasidunganna eal, margorak-gorak idaia supping ni halak pala mardalan marjereng-jereng angke madung antong lenong tile.
Salaludo antong dituturkon ompunta nadung parjolo mulak tu rahmat ni Tuhani ulang ning ibana ipasahat pisang nalamun tu bodat, pisangi tos mei sude, ulitnaipe macancan dapotan songon sorbuk kopi, pala ipikir-pikir nangkan napisang mantong pasahaton tu bodat sangajo inda adong harapanbe nangkan naso tos pisang naipasahaton.
Jolmaido antong nalupa di tutur poda ni ompunta naparjolo, anta baen naso taora nabagedo inda binoto, salaku sarat naiparbaen songoni, sapala marpenong-penong kasidunganna, orgos totmu ning dongan sian samping.
Songoni juo ajaran ni ugamonta nasalalu itabege ituturkon guru-gurunta,ulang ningna sala pasahat, nangkan rundut mei ujungna, ulang ipasahat ibaniba tu bayo bope dompak markuaso bayoi, santongkinnai mela dei sorot nai, ulang ipasahat harto niba tu panangko, nangkan namela-mela sotik mei, ujungna abis sude limpot songon abuan naiombus ni angin.
Pala tuhalak sanga tu binatang do ning guruntai ipasahat ibaniba sanga harto niba nangkan na marsuap ilu mei ujungna tangismei dipintu kecewa, hasidunganna mabir mijur toru mangida dongan, loja gopak soding, loja gulung juguk, songonima panjaharona markusor-kusor markurung dibagas parpidoan.
Angke tangkasdo itabege carito ni dongan, ipasahatia ibania tu bayo tukang olah, sapala inda binoto-binoto kehe bayo tukang olah, tusia juo nadangolna, taonkon bungkukmu isi, nakehemau ning bayo tukang olahi ningroa laos marsitijur tile.
Hasimpulanna pala nasala pasahat salolot naon jadi palajaranma nian dihita dihangoluanon, ulangbe tu pudi niari itapasahat ibanta sangape hartonta songoni pinompar-pinomparta tu bayo sanga tu binatang, tu Tuhanta namarkuasoido ajaran ni guru dohot pituh nisimatobangta ita pasahat, arana ibanado napaling mamboto dohot napaling markuaso, anggo halakdo, markuasope, santongkindei, inda sadia lolot namela mei sorot nai, lepe mei sisungut nai.
Sadebana dabo jolmai naiambang niado nakekal abadi kakuasaanni jolmai, inda ibotoia duniaon marputar songon roda, indaba nian jabat moncong songon gasing, ipasahatia ibania tu jolma, sapala dung ipaturu dongan jolma panyahatan niai, marperek-perek ia tangis, nangkan ona tombomkonma daboon ningia, inda binoto sanga namonga ahania, maha songoni ilalaia anggo halak namahado tile, pala namaha, maha matusi batas migia maha ahania.
by : Bayo lubis