MARSIDAO-DAO (episode 5)

Marsidao dao cover

Novel Mandailing

Naisuratkon : Dahlan Batubara

Tar pukul dua, das ma Si Imran tu poken Sinonoan, poken ari Rabu. Manaek motor Anatra do ia tingon Panyabungan tu Sinonoan nagiot manopotkon Si Muklan namarjagal gulaen laut i poken i.

Ngada na totop parjagalan Si Muklan, ijia poken tu si do ia marjagal. Pala ari Sinayan tu poken Mompang ma ia maroban gulaen nia i, ari Salasa tu poken Kayu Laut, ari Orbaha tu poken Sinonoan, ari Kamis tu poken Panyabungan, ari Jumahat tu poken Simangambat, ari Sabtu tu poken Kotanopan, ari Akad tu poken Malintang.

Marlao-lao songon alak nagiot manabusi tarida Si Imran i poken i. Ngada nagiot manabusi ia ba, angke ngada natarbagi epeng panuor sitabusion, tuk tu tambang ni motor kehe dot muli maia epeng i cakuk nia. Tai icakuk kameja nia adong do epeng naibalun ikobet i palastik bahatna 650.000 rupia, nangkan lehenon nia tu Si Muklan panggarar sadeba ni parandukan ima epeng naisolang nia tar sataon nasolpu tu Si Muklan sabahat sajuta lima ratus ribu rupia.

Ngada sajia rongom be tarida ia alak i poken i, angke ma onok dung lopus kotu Zuhur. Tar sataon nasolpu les bahat dope alak i poken i bope madung pukul 2 arian. Harana tar deges dope parepengan ni halak pala manggadis apea ibaen tuor ni apea targodang dope. Ra dope 15.000 santak tu 17.000 rupia tuor ni apea i partimbangan an.

Tai sannari, nadaoan madabu tuor ni apea i, tar 5.500 santak tu 6.500 rupia doma sakilo. Ima so marmorongan halak panguris. Mari-ari tuor ni dahanon napupu mur magodang muse, madung tar 45.000 sasuat.

Pala pinompar niba lima halak, ngada na tuk 3 suat sapoken, ra do 4 suat. Pala 4 suat noli 45.000 rupia gonopna 180.000 rupia. Epeng tuor ni gota pe tar 300.000 maia sapoken, harana somalna tar 50 kilo santak tu 60 kilo maia borat timbangan ni gota ni halak sagurison. I pe deba namarbola do pangguris i dohot nampuna gurison. Bola tolu, sambola tu siampuna, dua bola tu si pangguris. Pala dua bola sian 300.000, tar 200.000 maia tu si pangguris. Bo, jia mantong tuk tu dahanon guleon bei, harana tu dahanon ma kehe 180.000 rupia pala lima pinomparsa.

Jarupe songoni, ima holong ni tuhan ni hita i, les namangan dope halak i, bope namarkancit. Adong sajo do dalan ni arasoki, asal ma nara boti ringgas. Adong antong eme na sian saba ma panguraki ni sidangolon, adong namargulen ma pandungkapi ni naso tuk, adong muse panggadisan bolgangon naicalong na isuan i lambung kobun gurison, soni muse epeng ni soban tasir naioban sian kobun gurison, sadebana kehe manjalaki robung ni bulu soma tu arangan.

Sonima dangol ni sipangguris i banua ni Indonesia on. Ngada tolap ni pamarentah pature panggadisan ni gota. Madung tarbonggal ma tingon televisi pamarentah negara Thailand dot Kamboja do namalo pature panggadisan ni apea ni sipangguris nia. Harana pamarentah Thailand malo do tarbege manyuru alak namalo namarepengi pajongjong paberik ban, ima so inda sude gota tingon Thailand igadis tu nagori ruar. Ima so nagodangan tuor ni gota i sodun.

Tai, i Indonesia ngada songoni malona pamarentah ni hita i. Hum tar tolu maia bahat ni paberik ban, ima so bahatan do apea ni pangguris i igadis tu ruar nagori, marsiradu muse do tarbege pamarentahta dohot pamarentah nagori ruar namanggadiskon apea i tu paberik-paberik ban na adong i Jopang boti i Korea songoni muse i Amerika dohot Cino.

Pala malo sugari pamarentahta manyuru namalo namarepeng i pajong-jong paberik ban bahat di banua Indonesia on, ngada aru manggadis gota be hita sugari tu ruar nagori, ngada marsiradu muse, harana pambaen namarsiradui ma bonggalna so madabu tuor ni gota i.

Ban ni motor pe bahatan do na ro tingon ruar nagori. Hita do nampuna gota, paberik ruar nagori manabusina, igadis alai muse ban i tu hita on. Si panabusi ban dope sinaloanta. Tardokon ma numur 6 alak Indonesia nabahatna manabusi ban iginjang portibi on. Anggo ietong bahat ni alak namamake ban i Indonesia on, inda tuk be sugari apea ni pangguris i tu namambaen ban i paberik i pala bahat paberik ban i Indonesia on. (marsambung)