Madung Marbalun-Balun Boto Angkang Tururaan

Sangajo natangkang boto parmainanon, palan-palan songoni iresek-reseki amantai, mulo-muona irampingkonia, sapala ipainte ia santongkin mangolu-olu osa, hasidunganna itunjangkonia boto marbalun-balun doma jabatna tururaan, mangkasarbing gurung-gurungi songon gurung-gurung ni gulaen panyargutan ni borang.
Anggoon madung osah pandokon ni halak Padang Bolah, nabahatan boto halak-halak nasalolot naon naraja parroa, nabeteng pangecek, nalandit songon bolut naigomukan, sapala bangkit simangot ni amantai juguk tondo doma boto manungkol isang marpupu madabuan dong-dongi songon pardabu ni ambasang, pupu nabatuk-batuk, manombo mangkehem-kehem songon ambeng nabaru mangalngei sirompas para.
Adongdo boto mandokonna, dung ikapak amantai songon gulaen nahona tuba doma deba boto jolmai penong songoni marputar-putar di longko-longkoi, angke songondia antong ibaen, marsiatonkon bungkukna domada pala maborattu pananggungani ipajot-jot doma minum ngiro namacom, anso ulang jabat motar-otar parkosai, sotik songoni di inum, ulang jabat bahat, malang mabuk muse, mur marrempotan mei hasidunganna.
Inda adong boto namarngak diamantai pala dung mungkap naisandang niai, natup-tapdo songon pandoit ni dal-dal, ise nabeteng roana sangape na patikal-tikalkon Nabulus ona jonja do inda namarjanto boto songon sinapang jojal, Nabulus dopengdo, haranii mantong anso marnetekan doma jabat dong-dongi, alap-alapi jolo, sangantong songon padati namardalan diombik, namur matangkang doboto parmainanon, salolot naon iambang naso barani amantai, rupana napainte waktu dohot hatihado tile.
Inda boto olatni carito sajobe, nadung laluma nalalu, madung maramping, madung ona tape, madung suk-suk muse tu ruraan jumampar jumarorap doma boto, ibaratni na manjolung tarutung natup-tapdo ro sian ginjang, inda namarsolatan, anggo ijagahan ditoru ni tarutungi nagkan namarbosarido boto tangkuhuk dohot talonan.
Nalain pasangna jabat mungkap naisandang ni amantai, inda naporlu disia sanga isepe jolmana, adongpe mandokonna ulang ijama-jama anggo sutan napasutan-sutan, iropuriado songon pangaropur ni manuk sabungan, itaji ia pangkal supingi dapotan, ulang nagkan nai-alap-lapanbe dongan sangantong mapondok diali, madel-del bibiri dapotan.
Songonipeba tangkangna amantai inda nasumbarang sadung, naidalannado, anggo nadenggando amantai dope nalobi denganna, tai pala dung iboto iama parange ni sada-sada halaki nasutanma ilalana salolot naon, anggoi maturutpma ipasangia, inda napantan, anggo inda marciok-ciok mangido-ido ampun inda iantakia manjojalna.
Iambang dongani dope namangaranga-rangai sanga isedo nangkan naisargut parjolo, hape rupana na songon ombak nilaut doma arorona marbalun, balun, dobur-dobur ombak nilaut, marpupu amporik manyerbeng-nyerbeng, nasingitmada boto so polut, panailiipe madung marteleng-teleng, inda adong boto paradianan padang nabolado boto boluson, inda dong boto pangaduan, nanasib mantong baya natuauon, ningnadoma hata pandelean.
Antong anggo songoni jadi pangalamanma dihita namangolu, duniaon natorusdo marputar songon roda, pala dompak diginjang ulang marsitijur nangkan nahona mei halak naditoru, pala dompak gabe ulang sombong ngada jabat nalolot dihagabean, santongkin do hita namangoluon, nangkan namulak-mulak tu tanodo ujungna ning tobang-tobang naparjolo sunduti, madung tangkas ita iada napasutan-sutankon salolot naon madung itojnkon amantai marbalun-balun doma tu ruraan, inda nasompat boto mandokon painte jolo, Nabulus dotekdo jantan ni sinapang jolal, margorak gair-gairannai nadobur doma songon sora ni ronggur namanaha batang nibargot.***(Bayo Lubis)