Balun Amakmu

Ganjil nian begeon tai songonima natarjadi di hita namangolu, pala dapot hatihana angkon naibalunma amamkniba, pala ampot antong inda tarbalunibabe naibalun nihalak dei nian, arana pala manengget motor naso marroda dohot naso marsitangi, inda natarbaenbe mambalun amak nailompit ni dongan doma tangan mamasukkon badan simanare tubagas nagolapan, ibalun dongan juo dei nian amak niba nahombang di motor naso marrodai tile.
Songoni juo antong satontang namambalun amak majolo, pala nagiot modom sangape hatiha markuayam-kuayam, ipaombang mantong amak niba anso sinok namodomi, pala dung tarsunggul ulang ipadiar leng hombang, ibalun mantong amak niba.
pala adong SK pala barisan pagawe, mutasi ning kalai gorarna, copat-copat mantong marsibalun amakna ulang palambat-lambat ilondat dongan malang lengna tuho juo dei nalampot. Inda namarkapili antong ise sajo halakna bapak Peresiden, Gubernur, songoni bapak Bupati pala dung abis masa jabatan naitontuon marsibalun amakna mei, inda ipadiaria songoni leng hombang songon nai jombur dilas niari.
Pala saro – saro najolo hatiha mambalun amak iparesodei tangkas sanga adongdo namanjarari diamaki, arana pada masoi bahat tanga, laon mambalun amaki iligi mei sanga adongdo tanga namanjarari, inda sarat namambalun sajo, anso pala ipaombang ulang sampat marasar tangai di amaki, mngarti maita antong parange ni tanga namangincop daro ni halak dei tile.
Martaringot namambalun amak namartanga adong dei boto tarjadi di maso nadung salpu, bayo tobang natar hodar halakna ibalunia songoni amak nia namartanga, bo maranak-anak tangani, marsolotan anak-anak nai di baju sangape di kupia nia, sapala kehe ia tu musojit, pupu manggomai nasumbayangi, manjarar muse boto tangai tu baju ni dongan, sapala namanggoma-gomai doma halak nasumbayangi, na susahan doboto pala natangaon gorarna, songon nakajajangando dabo pala mandoit, tup-tap songon pandoit ni dal-dal.
Pala namambalun amak mantong karejoi, tangkas-tangkas ipareso anso ulang markoti, ulang muse antong marsar-saran tanga sangantong susah dongan patundana, ibalunia amak namartanga, sarsar antong malang, manjarari tu karosi ni dongan, martanga sude dohot meja kerja, nasusah doboto karejo patundani tanga namanjarari.
Pala naso tarpareso jabat sanga namartangado amak nangkan balunoni diusahoonma ulang sar-sar jabat, arana pala sar-sar tanga nagkan namaranak-anakmei tangai di kupia ni dongan, ujung-ujungna goma tot goma ulu mei karejoi songon parange ni mondik di tambatan.
Bope natartangkang begeon pandokonnai, pala tibo hatihana ibalunma amak niba ulang jabat sompat ibalun dongan, arana pala dongan mambalun amak niba naso markatontuan dei pambalunna , nasumbarang sadung domei, bope dompak tagi namodom di ginjang amak asur nahapali, pala dapot hatihana balunma amakmu.****
By : Lubis