MARSIDAO-DAO (episode 39)
- account_circle Dahlan Batubara (Redaksi)
- calendar_month Senin, 22 Agt 2016
- print Cetak
Novel Mandailing
Nanisuratkon : Dahlan Batubara
Marsidao dao grafis
“Oo..soni dei langa”.
“Olo, ubakma baru lehen tu sia. So marsitandahan homu dua,” ning Si Mulhan.
“Mabiar dei au donok tu bodat i,” ning Si Poso.
“Nga mangalo i, boruna dei. Lehen ma so itandai ia ho”.
“Olo, Udak,” ning Si Poso.
“Ubak jolo pantat ni aramabir i, dungi gotap pantat ni takar nai so matombuk. Patungki aek nai tu mangkuk i. Dungi muse bongka arambir i, olut panganon nai, pasada tu nasabongka i. Dungi, sabongka na madung kosong i ma isi dohot aek ni arambir na i mangkuk i, sobaru lehen ma tusia,” ning Si Mulhan.
“Olo, Udak,” ning Si Poso sareto mangubak arambir poso i. Sidung ibaensa sude nanidok Si Mulhan i, iobansa tu bodat i.
Taru na mabiar do bodat i namandonok i Si Poso. Jongjong songon nagiot mangilakkon ibana, matana mabilak-bilak, babana mubit-ubit songon na giot marciok-ciok.
Ipatibal Si Poso arambir poso na dua bongka i sareto mandao mulak sian bodat i. Dung dao Si Poso, nanipadonok bodat i ma tu arambir poso i laing pupu manjoling-joling mabiar tu Si Poso. Ipaunduksa tu arambir i manginumsa, inot-notsa mandornguk-dornguk. Sidung i, ijatanna na sambongka nai, ipangansa tai laing pupu manjoling tu Si Poso.
Dua saba ma tarpaijur alai bona ni arambir ni alak i. Potang ni ari, ibuot Si Mulhan aldungan na tingon odong ni arambir. Ilehensa 8 arambir tu Si Poso.
“On ma jo, Amang. Naron ita gadis tu pamuge i, so adong obanonmu epeng tu bagas,” ning Si Mulhan.
“Olo, Udak,” ning Si Poso.
Sidung markobas, marsialdungma sialdungonna. Mangalao alai udur muli tu huta, Si Mulhan mangalao tingon jolo megot-egot nibaen na marboban i laing tiop tali ni bodatna na mangalao i jolo nia. Si Poso mangiut moteng-oteng megot-egot tingon pudi aldung arambirna i abara siamunna.
Tolap tu jolo bagas ni pamuge ni arambir i, marsipaijur aldungonna. Sidung marbuniago, ilehen pamuge i epengna tu Si Poso sabahat 18.500 rupia. Na jop ma ilala Si Poso manjagit epeng i. Ilompitsa denggan dompak so ibaenna tu cakuk saraorna.
“Lehen ma ji umak 15 ribu, lobi nai baen ma tu tabung pokak deba, deba nai ma epeng sikolamu dohot anggimu,” ning Si Mulhan.
“Olo, Udak,” ning Si Poso.
“Dungi, ancogot ro muse ho da, Amang, tu saba ni alak Si Koddam an ma ita ancogot topotkon au dung mulak ko sikola,” ning Mulhan.
“Olo, Udak,” ning Si Poso.
Sidung marsarak alai, nanilojong Si Poso ma tu bagas ni alai an. Marjop niroa na madung dapotan epeng nabahat, epeng nangkan ilehensa tu inangna. On dope irasoina manjagit epeng sai nabahat.
Dompak tar dao sian bagas ni alai i, ipasona lojongna. Ielasa mulak epeng i sian cakuk saraorna. Iligisa epeng i, ipamanat-manatisa.
“Alhamdulillah,” ning roana mangaligi epeng i. Ielasa sabahat 15.000 rupia, ibaensa tu cakuk siamun nangan ilehensa tu inangna. Deba nai, sabahat 2.000 ilompitsa muse ibaensa tu cakuk siambirang nangkan epeng sikolana incogot ni ari dohot anggina saribu be. Na 1.500 nai ibaensa tu cakuk ni bajuna nangkan idabuna tu tabung pokak. (marsambung)
- Penulis: Dahlan Batubara (Redaksi)
