MARSIDAO-DAO (episode 46)

Novel Mandailing

Nanisuratkon : Dahlan Batubara

Marsidao dao grafis

Songon namargunom doma alai i tano i namangaluk pompar Si Siti i. Martangisan matunguk-nguk marsidokonon sidokononna, paluas lungun ni rohana. Marbolas taon painte-inte boruna, sanga na ijia ngada binoto. On, madung do ro pomparna maroban tompa ni inangna dohot tompa ni amangna.

“Mana ibumu, Nak,” ning ompungna.

“Ibu kami sakit di rumah, Nek. Ta bisa naik mobil,” ning Si Poso.

“Oh…Siti anakku baya,” ning ompungna.

Dung erer na martangiasan i, mangalao alai tu bagas. Ompungna manogu Si Poso, bujingna manogu Si Pikek.

“Mari masuk, Nak. Ini rumah kita,” ning bujingna tu Si Pikek.

Nanipajuguksa do daganak iombar alai, sareto mangapus-apus ulu ni daganak i. “Siapa nama kamu, Nak,” ning ompungna.

“Aku Si Poso, Nek,” ning Si Poso.

“Aku Si Pikek, Nek,” ning Si Pikek.

“Oh baya, cucuku,” ning ompungnai mangaluk si Poso sareto mangapus ulu Si Pikek.

“Ibu kalian sakit apa,” ning bujingnai.

“Ibu kami batuk darah, Etek,” ning Si Pikek.

“Oh baya,” ning ompungna.

Tongkin i, italepon Si Isrot tu udana Muklan. Ngada sajia onok mangalus talepon i.

“Imada, ning Uda. Madung i bagas ni nantulang on do ami. Allhamdulillah, torkis do nian ompung ni alai” ning Si Isrot.

“Alhamdulilah. Anggo songoni lehen ma tu ompung ni alai HP nai so mangecek dohot parmaen on,” ning Muklan.

“Bu, ini telefon dari uda Muklan di rumah kak Siti,” ning Isrot sareto mangalehen heand phone i tu ompung Si Poso.

“Assalamu’alaikum,” ning ompungna manetekkon ilu ni matana.

“Wa alaikumsalam, Bu. Saya amangborunya nak Siti, kahanggi dari keluarga mereka di Mandailing, Bu. Kebetulan saya lagi di rumah nak Siti,” ning Muklan.

“Oh, terimaksih, Pak, telah menjadi keluarga anak kami di Mandailing,” ning ompungna.

“Iya, Bu. Telefon ini saya berikan  kepada nak Siti biar nak Siti bercakap dengan ibu,” ning Muklan.

“Baiklah, Pak,” ning ompuna. Ngada sajia onok mangkuling ma sora ni Si Siti i heand phone i.

“Assalamu’alaikum, Mak” ning sora Si Siti lambok.

“Wa alaikumsalam, anakku,” ning inangna laos manaonkon tangis maribo-ibo.

“Mak…,” ning Si Siti lambok manyeret nibaen ni tangisna. Tangis naloja. Ngada adong gogona marsora nibaen akoletan ni situhukna.

“Iya, Nak. Ika omak, Nak. Apa khabakhmu di sika, Nak,” ning inangna.

“Indak bisa Siti datang, Mak, kakhna sakit. Udah sampe ja cucu omak tu?,” ning Siti.

“Cucuku udah di sika, Nak. Si Poso mikhip ka kau. Kalo Si Pikek mikhip ka ayahnyen”.

“Maafkan Siti, Mak, kakhna udah balakhi dakhi omak”.

“Inda apa, Nak. Samonjak dulu pun omak sudah mamaafkanmu. Sabolum maninggal pun ayahmu sudah pala mamaafkanmu, Nak”.

“Sudah maninggal ja keh ayah, Mak..oh..?!!,” ning Siti tarsonggot mambaen marsak damul manyarira ngot-ngot i rohana.

“Iya, Nak. Sudah pala sambilan tahun nan lalu enen ayahmu maninggal”.

“Ya Alloh, ampuni hambomu ni ya Alloh. Maafkan Siti, Ayah”.

“Sudahlah, Nak. Hakhi ika datanglah kayi basama adekmu Laila ya, Nak,”  ning inangna.

“Iya, Mak,” ning Siti.

Adong do tar sapulu minit alai namartalipon i. Nibaen naso tolap Si Siti leleng mangecek i ima so ngada lolot na martalipon i. Jaru pe songoni, na rumbuk do tahina nangkan mangalangka inangna dohot bujing ni daganak i tu Mandailing luas kotu Luhur.

Rumbuk ni parpokatan ni alai i bagas i, Si Hamzah pe dohot do na tu Mandailing i. Samotor do alai rumbukna, harana tampail do alai pitu halak i bagasan motor Kijang i. Daganak ni Si Laila doma tambana, ima daganak kalas 2 dope sikola dasar.

Dompak so kotu Luhur i, nanioban Si Laila do Si Poso dohot Si Pikek kehe tu poken manabusi silua nangkan obanon tu Mandailing. Ngada hum silua, pakean Si Poso dohot Si Pikek pe dohot do itabusan. Santak do opat sitel be pakean i. Soni muse solop na.

I bagas, nanipio ompung Si Poso ma napature kobun ni alai i, mangobarkon nangkan na kehe ibana dohot Si Laia tu Mandailing sanga piga ari ngada binoto.

I luas kotu i, dung muli pompar Si Laila i tingon sikola, na langka ma alai kehe tu Mandailing. Dompak so i, tu bagas ni Hamzah do jolo alai mangalap pakeanna sareto mangobarkonna tu dadaboruna boti bou-bou ni daganak i parkehe ni alai na tu Mandailing i.

Si Laila dohot si Hamzah do maroban motor i martukar-tukar. Harana si Hamzah malo do maroban motor dompak unjung marinduk somang na solpu i Siantar maroban motor ni paberik topung kanji.

I Mandailing, i kotu Asar i, naurker ma mulak batuk Si Siti. Mambatukkon mudar tu kadak ganan ni mudar i. Na margoso do dadaboru Si Muklan dohot dadaboru Si Mahlil paturesa. Adong na mamisat-misat tangkuhuk Si Pikek, adong na mambuot aek milas tu tataring i salaos mangambit Si Rahim.

Tarsantak do sanoli on na mambatukkon mudar i. Jabat do tar 4 noli Si Siti mambatukkon mudar i tingon kotu Asar santak marayak Magorib. Nanipio doma si Muklan tu bagas i mandongani alai pature Si Siti.

Marayak Magorib i ma Si Siti payak gale inda manyodarkon ibana. Rumbuk ni tahi, nangkan ioban do tu ruma sakit tongkin i.

“Alap ma becak masin, Amang” ning Muklan tu poso-poso ombar jiren i. Marlojong poso-poso i tu dalan an manjalahi becak masin. (marsambung)