MARSIDAO-DAO (episode 9)

Marsidao dao cover

Novel Mandailing

Naisuratkon : Dahlan Batubara

“Aropku tu lombang ma ita mangalaho, Ipar. Harana tar 3 tobat nai pe anta ra ma pukul 3. So pupu mandonok hita tu partanobataanan,” ning Si Imran tu Sibasiron.

“Olo, Lae, tu lombang ma hita,” ning Si Basiron.

Ontat ni dua tobat dope ibolus alai, ro joung-joung ni Si Totop tingon jaean. “Si Totop dei namanjoungi,” ning Si Imran.

“Olo, bana mai, aha namaua,” ning Si Basiron sareto maripas-ipas alai manaek tu gadu i. Tarida alai tu jaean marlojong-lojong sada halak marlampu taromak i gadu saba i.

“Ho dei Totop..!!!,” ning Si Imran manjoung gogo.

“Olo…!!!, tu son ma homu sigop…!!!,” ning sora Si Totop. Na mur maipas ma alai nadua manompotkon Si Totop.

“Aha namaua, Pareban, ma ijia Si Lagut,” ning Si Imran dung donok tu parjongjongan Si Totop i.

“Naupajuguk do ia i sopoan. Na mar oi oi do ia ona doit lipan i gadu saba,” ning Si Totop. Maripas-ipas ma alai mangihutkon Si Totop. Dung tolap tu sopoi, tarida ji halai Si Lagut juguk mar oi oi maniop pat siamun.

“Ubati au Ipar, oihhh..inda…inda.. tolap ngot-ngotna, ona..tu jantungi ulala booo..,” ning Si Lagut.

“Jadima, tu topi ni pantaron hamu juguk, dungi paambe pat na ona doit i tu tano i,” ning Si Basiron. Dung ipaambe Si Lagut pat ni ia tu tano i, adope ibuot Si Basiron ma lading sareto mangaloncopkon ujung nai tu tano i laos mubit-ubit baba ni ia. Iputar ia tu simanun dohot tu siambirang marnoli-noli. Inda sajia onok icungkil ia tano pangaloncopan ni lading salaos ibuotsa sanggolom.

“Paostang ma pat muyu tu pantar i,” ning Si Basiron tu Si Lagut. Dung ostang, idalkapkon ia tano i tu pat Si Lagut tontang na ona doit sareto mubit-ubit muse baba ni ia. Dungi, ipisat ia ma pat Si Lagut tontang arumpang laos ipadalan ia tangan ni ia santak tu na ona doit. Santak tolu noli ibaen ia songoni.

“Mudah-mudahan merer mei ancit nai,” ning Si Basiron.

Adongma tolu pangidupan halai i sopo i painte-inte malum pat na idoit lipan i. Alak Si Koddis dohot Si Mahmud naso tarida dope torang ni lampu taromakna. Jaru pe songoni, ipante alai do sapangidupan nai. Mari-ari pe ngada nadao sopo parjugukan ni halai i tingon partanobataanan, nangkan tarida do naron pala ro Si Koddis dohot Si Mahmud tu partanobataan i.

Tar pukul 3 tarida ma i nadao torang ni lampu taromak tingon lombangan na pupu mandonok tu partanobataan i. Dung tu partanobataan i, ngada so alai, ipalaluna do mandonok tu sopo parjugukan ni alai opat i.

Dung tolap Si Koddis dohot Si Mahmud tu sopo i, ipalalu alai ma pardalanan muli. Si Lagut pe madung malum do ilala ia na ona doit i. Sonima i huta i, adong-adong dope namalo mangubati na ona doit, bope na idiot ni lipan boti na idiot ni ulok asape na ala. Na iparsiajari tingon natobang-tobang, ima namangubati dohot do’a-do’a tingon ayat-ayat ni Qur’an.

Ngada tola do’ana nasihil-sihil, angkon Qur’an do ning guru sikola maktab boti guru mangaji i, harana pala na sihil tingon Qur’an nangkan mardosa do naidoksa, namarsakutu dohot setan sangape na jihin, musyrik do uhumna. Harana tu tuhan do sude pangaduan boti partolongan, ima Allah Subhanawata’ala namangadongkon langit dohot banuaon.

Dung tolap halai tu banjar i, ipalalu halai tu jolo lopo Si Dalkit i, na madung mantak marjagal harana madung marayak pukul 4. Iparung-rung alai sude gulaen i iginjang ni bulung pisang na iatak. Nabahat do gulaen i dung iparung-rung. Ipasimbah ma aruting dohot tingkalang na godang-godang, marbeso ganan na sian piri-piri, nila dohot bolut. Sude gulaen i ibola onom, sambola sada halak.

Bahat be do alai gulaen i. Dompak pauli-ulina boti mambituai gulaen i Si Siti i dapur, tarahim tingon masojid pe tarbege ma. Si Imran ma modom mungkor i bilik. Tukma tar tolu ari gulaen i ambaen guleon ni halai. Na godang-godang nai isale, namenek-menek iasompode. Adong muse do deba igoreng ambaen gule mangan manyogot santak tu mangan kotu. Na iasompodei sadebana guleon borngin, sadebanai gule ancogot nai. Na isale i les gampit ipanyalean i hiang-iang ambaen pangaronca aduan ni ari. (marsambung)