Nahancitma Boto Pala Naso Mamboto

Namarmocom-mocomma tarimohon ni jolama dihangoluanon, adong antong nadung adong gabe suada, nabiaso kehe tupoken manabusi balanak dohot sira sangape kaporluan nalain-lain, sapala baen madung rungrung cakuk, inda bisa kehe tupokenbe, namancit dei antong.
Adong muse antong nasib ni jolmai inda namarnamurak panyakit, iubatan boltok mancit ulu, murak panyakit ni ulu marbosar tot, ipe namancit juo dei pananggungani, adong muse naikojar-kojar ni utang ari-ari, indape ngort amporik marayak torang niari madung ro manunggui utang, nasangkalmuse boto ancita nasongoni.
Hatiha manegecek-ecek dua halak di bangku-bangku parjuguk-jugukan, marsisapaanma halai sanga ahama naancitna panarimoan ni badan simanare di hangoluanon. ro ning nasada igiling roda ni padati ningia patnia dompak hatiha menek-menek, sampe sannari inda murak-murak, namancitdo boto ningia laos patidaon bokasnai embal domantong tot nia jabat.
Anggo au boto naancita mulaido sorang au tu ginjang ni portibion inda unjung jabat mangida rupo ni damang, sanga nabontar, sanga nalomlom, sanga natampan songon alak barat unda unjung jabat huida, gambarnape antong inda adong ambaen ligi-ligion ningia musema mancaritoon ancitni roa nia.
Sapalaro sada bayo manjogol-jogol, ibege ia caritoi namarsidokon ancit niroanado halai, aupe boto adongdo napalming ancit pangalamanku namangoluon, dihatiha menek-menek, arana bean dogilna iba inda manangion naidokon ni simatobang, ikobet damangma au di taruma, indaban margorak, isulangi dainang ma boto mangan, anggo tangani kobet sajoma tu pudi, ikobet muse pat tu tiangi ning bayoi musema, marmocom- mocom parkancitani dinamangoluon baya ning bayoi, laos rurus aek ni matania.
Anggo ompung lomok pala marcarito satontang pangalaman nia nahancitna ningia namangoluon naso mambotoma, arana anggo maso najolo bahatdo halak naso marsikola, poso-poso sanga bujing-bujing nagiot manjalai sanggak parpiraanma umna sikola rakyat maia, ipe inda jabat tammat, sapala marripema mamolus adat matobang.
Ompung halaklai naringgasan manjalai gulaen, sapala dapotia gulaen nagodang, nakehema au boto manjalai uali nagodang baen godang nigulaen nagiot guleoni, arana inda tampil di uali namenek, ning ompung lomok.
Sapala naipantataan ni halak doma boto, ipantik-pantik do dabo pala gulaen nagodang, inda igule ibul-ibul ning halak, naila maboto roa, nahancitma pala naso mamboto ning ompung lomok, angke inda binoto jabat namamntik-mantik gulaen, idokon donganpe naoto naunduk doma iba songoni ningia ompung lomok laos mangilkili burangir.
Anggo pandapot ni ompung lomok naso mabotom naancita dihangoluanon, arana igadis dongan jong-jong songon carito ni Abunawas, igadis ia rajai lao-lao, harani ima anso ulang marnaloja marsikola manjalai sinaloan, arana inda adong batasna namanjalai sinaloanon, dung matobangpe pamatang angkon na totopdo ringgas manjalai sinaloan, pala mangajipe misalna angke adongdo kaji tobang-tobang, baen hancitna naso mamboto ulang iparmuda sayang namanjalai bisuk dohot poda.***
.