MARSIDAO-DAO (episode 27)

Marsidao dao grafis

Novel Mandailing

Nanisuratkon : Dahlan Batubara

Ari Kamis, ima ari poken, ngada kehe alak huta i tu pangomoan, ari maradian goarna. Deba kehe tu poken Panyabungan manaek motor Anatra sanga pe manek beca masin. Tai, bahatan do tu poken na donok i, ima Poken Donok goarna i huta Gunungtua.  Angke, nibaen parsuadahan i ma mamben alak nagada sajia marpoken tu poken Panyabungan.

Salaos mangambit Si Rahim, nalao ma Si Siti tu Poken Donok. Poken i tigor tingon dalan godang i tu jae an. Bahat do na tingon huta Manyabar maroban jagal gualen nila na nisale sanga na niasompode. Adong muse marjagal pau dohot sumangge.

Inang-inang Jawa na tingon Sidojadi, Malintang, dodasna marjagal tape gadung rio, kue jawa, karupuk matun, pocal dohot rampejek. Tingon Siabu sanga Sihepeng bahat maroban bolgangon dohot pisang.

Na marjagal ihan laut pe adong. Marjagal monja, jagal pinggan, jagal sate, jagal gombung-gombung sampe tu jagal CD lagu-logu Mandailing sanga dangdut soni muse film Mandailing.

Dung manabusi timpi satonga kilo, balanak arga 10.000 rupia, sabi sakobet, lasiak dohot bawangna, ipalalu si Siti manabusi kue jawa, karuar ma ia tingon poken i.

Luas kotu Luhur, muli tingon sikola, na pupu ma ipangan si Pikek dohot Si Poso kue jawa nanitabusi ni inangna. Sonima muda ari poken, les na kue jawa ma nanitongos ni alai tu inangna. Mangan pe ngada saru sajia nibaen ma butong dompak so mangan.

“Kehe umak jolo manyapai pangomoan tile,” ning inangna tu alai.

“Olo, Umak,” ning Si Poso.

“Tutup mulak indahan i dung sidung mangan. Tongkin do umak on,” ning inangna.

“Olo, Umak,” ning Si Pikek.

Mangalao inangna mangambit Si Rahim mardalan i tonga banjar i, na kehe tu bagas ni Saleha na mian i banjar Lancat. Manyapai sanga ipadohotsa ia mangomo marsidao-dao. Harana na markuta ruar sajo do Saleha mangomo. Tolu ari ma Si Siti naso mangomo nibaen mur ma maol pangomoan i huta i. Saba na nibaenna pe dompak marayak gumorsing masona, adong dope tolu poken nai so manyabi. Ima, so na tolu poken on, mangomo marsidao-dao doma iroana.

I sopo na iadop bagas ni Si Saleha i ma juguk Si Saleha dohot si Murni dohot Si Marmah. Tu sopo i ma Si Siti topotna, mangecek-ecek dohot na tolu alak i.

“Imada, Eda. Ma maol pangomoaan i huta on. Tolu ari ma au naso mangomo, baya” ning Siti.

“Ma maol pangomoan sangajo maso on, Eda. Pala nagiot dohot do, kehe ma ita ancogot, Eda” ning Saleha.

“Olo, baya, tu Huraba ma ita ancogot,” ning Marmah.

“Oban ma tajak dohot pangkur, harana maso on dompak manajak mamangkur karejo saba i Huraba, Eda,” ning Murni.

“Pukul piga do ita ancogot margogas,” ning Siti.

“Luas Subuh ma ita marsipaintean i son,” ning Saleha.

Ari madung marayak pukul 10 borngin. I pantar tonga bagas i margulung-gulung alai dung sidung mangapil parsiajaran sikola. Inangna manyorpi baju salaos manganggun-anggun Si Rahim.

“Ancogot, oban anggimu tu Ompung Rosma laos kehe tu sikola da, Inang,” ning inangna.

“Olo, Umak. Pukul piga dei umak mulak sian marsidao-dao,” ning Si Pikek.

“Ra dobai luas Magorib tolapna tu uta on,” ning inangna.

“Dao langa Huraba i, Umak,” ning Si Poso.

“Pala marmotor ra ma satonga jom i dalan. Dodasna pukul 5 ma mantakna karejo saba. Maridi dohot markobas dope sobaru muli tu uta nai, so baru mangambat motor i dalan Huraba i. Ima so luas magorib doma tolap tu uta on,” ning inangna.

“Kehe Subuh mulak Magorib mei ti Umak,” ning Si Poso.

“Olo, Amang. Angke madung maol pangomoan i uta on. Ima so jago anggimu na dua, ulang patola alai itangkangi alak da, Amang. Pala mardahan potang anggimu sanga mambasui tu tapian, parorot si Rahim da, so ulang mardangol Si Pikek mardahan dohot mambasui,” ning inangna.

“Olo, Umak,” ning Si Poso. (marsambug)