MARSIDAO-DAO (3)

Marsidao dao cover

Novel Mandailing

Naisuratkon : Dahlan Batubara

Si Poso ma alai nagodangna. Naitadohon nia goarna Si Pikek. Ngada Si Pikek goar napetona, pio-pioan nia dei. Rofikoh Jannah Pulungan do goar sapetona. Pupu Pikoh ning amang nia tu sia najolo, kasidunganna ona pio Si Pikek. Sannari ma kalas 3 Sikola Dasar ia, sasikola dohot Si Poso.

Si Poso pe ngada i goar petona, Amir Bilah Pulungan do napetona. Tai, dompak juguk dope sinaloan nia najolo, pupu isibit alak muko nia sareto “oihh..poso doma baya ho, amang,” ning alak i baen jopna roa ni alai mangida ia. Angke antong nalagak partompa nia boti nabisuk tarida, ima so idokon alak naposo ia, na tampan ningna pala saro Malayu.

Anggi Si Poso namenekna goarna Rahim Bilah Pulungan, hum namalo lao dope marsirais-sirais sannari. Muda kehe inang nia tu saba, taru naiompa mei Si Rahim. Modom sinok muse ianggunan loba i sopo saba ni alai pala inang nia dompak i lupak i.

Saba pambaenan ni alai i, ngada saba ni alai i. Santak tu sannari naso adong do saba ni alai. Saba ni kahanggi ni alai do na ipabolaonna tu alai, bolakna tar sabun-bun. Dung muli eme, dodasna marbola tolu ma alai dot ampuna saba. Sabola tu ampuna saba, dua bola ji alai.

Alak naro do ayah dot umak nia tu huta i najolo dompak so adong daganakna. Baen adatna angkon adong parkahanggian ima so manopot kahanggi amang nia tu parkahanggian marga Pulungan i huta i. Ima so Pulungan marga ni alai. Harana, pandokon ni amang nia dompak ro tu huta i, tingon Bilah do alai ningia, donok tu Rantau Parapat. Ngada marmarga alai harana suku Malayu do.

Kobun gurison pe ngada adong, marbola muse dei dot ampuna kobun apeai. Songon saba muse parbolaanna, bola tolu. Kobun apea na iguris ni amang nia tar 400 batang, tardao sian huta i, mardalan pat tar 2 jom so tolap, angke parkamindil ni kobun apea ma gurison ni amang nia i.

Bagas iganan i maia dot tano nai na alai puna. Tano parbagasan na itabusi amang nia dung manggadis sere inang nia. Bagas namaronding papan, sada dapur, sada bilik, sada pantar tonga sanga pe ruar goarna. Pantarna simin. Dingding nai dot tarup nai pe naipiang dei longkang-longkang tingon lambung dalan an, itabusi amang nia tu sada bayo namanggonti bagasna tu bagas simin. Hum mura muse tuorna, harana tarsongon namanolong do bayo i tu amang nia.

Sapetona adong dope sere nalobi naioban inang nia, tai ngada tuk manabusi saba sanga pe kobun gurison. Ibul ni tahi ni amang dohot inang nia, mangomo ma jolo alai panambai ni sere, ngada sabinoto dung miduk anso itabusi kobun gurison, harana hum godang do arga ni saba umpado kobun gurison.

Tardokon do naringgas amang nia i huta i, soni juo inang nia. Dung sidung mangguris dodas dei amang nia kehe mangomo mangarabi tu kobun ni halak. Pala ngada adong rabion, soban tasir ma iobansa sian arangan, harana adong do i kobun gurison nia bona ni apea namarumbak sanga pe i kobun apea ni alak, dung made bona namarumbak i ma ikapak amang nia mamben soban tasir. Pala i kobun ni alak ibuotsa, totop do ipasimbah ia tar bahat soban tasir tu ampuna kobun tarsongon parbolaanna.

Songoni muse inang nia. Dung sidung babohon, kehe mangomo tu saba ni halak. Tai ngada tolapsa jot-jot harana urang padena ilala ia maroban daganak namenek nia tu saba pangomoan. Inda tarpasari-sari ia pala pir tompa ni parsabai pala kehe ia tu sopo i pasip tangis ni danak i anggunan. Angkon adong ma parorotsa parkahanggion nia so kehe ia mangomo. Tai, inda muse jot-jot adong alapangan ni parkahanggion nia, ima so inda jot-jot mangomo.

Tu alak pe tardokon do naringgas Si Imran, amang si Poso. Pala adong amalangan totop do ro ia tu alangani santak tu parkutahanan, soni juo amalanna di borngin ni ari nai. Tu horja pe ringgas do ia tarida halak, soni buse pangaligi ni kahanggi nia. Imran Ashari do goar nia, pio-pioanna do Imran. Soni juo adaboru nia goar nasapetona ima Siti Zulaikha, tai pio-pioanna si Siti.

Soni muse Si Siti, ringgas do tu alangan boti siriaon. Iobankon ia do sipaingot ni natobang-tobang i : tangi tu siluluton, inte tu siriaon. Taili tu jae dohot tu julu, paipas langka oban singgulu. (marsambung)