MARSIDAO-DAO (episode 15)

Marsidao dao grafis

Novel Mandailing

Nanisuratkon : Dahlan Batubara

Dung sidung mangan, na juguk dursat doma si Pikek dohot Si Poso i sopo i. Ro ni udan rimbus-rimbus mambaen saba na dao i tarida so tarida. Dua halak tarida mardalan muli i gadu saba an maniop bulung pisang panyanggop ni ulu so ulang litak tarudan.

“Parjolo ma ami muliiii..!!!,” ningna manjoung mangadop tu sopo ni alai i.

“Olo. Edaaa…!!! Togu-togu…!!,” ning Si Siti manjoung.

“Aso inda pe muli ita, Umak,” ning Si Poso tu inang nia.

“Marayak kotu Asar ma ita muli. Antap siang naron udan so ulang masuk angin anggimu,” ning inang nia.

“Aha dei Eda, Umak,”  ning Si Pikek.

“Eda i, ima partuturan tu iboto ni amang ni daganak ni iba. Bope iboto kandung, sanga pe iboto nadao,” ning inang nia.

“Ompung nami ijia langa, Umak. Dongan-donganku adong do ompungna, ami inda adong,” ning Si Poso. Sarrrr..dosar taroktok Si Siti, sareto paet ilalasa ijur i. Ngada ibotona sanga songonjia mangalusi sapa-sapa ni daganak nia i. Ngot-ngot ni ate-ate namalungun tu inangna ima na mian i Bilah mungkap mulak mamben ilu ni matana mardabuan.

Ngada tariada tu Si Poso dohot Si Siti tetek-tetek ilu ni mata ni inang ni alai, harana nanipaunduk Si Siti do ulu dohot tanggurung nia salaos pature pamatang ni daganakna na dompak memek iampuanna. Dung suada be ilala ia ilu nia boti mata ngada be maraek ma ia mangalusi sapa-sapa Si Poso.

“Bagas ni ompung muyu nadaoan do bagasna, angkon na tuk ma jolo epengta so kehe ita tu ompung muyu an da, Amang, bope ho Inang,” ningia.

“Nadaoan langa i, Umak,” ning Si Pikek.

“Olo, nadaoan, Inang. Ima so mangomo ayah dohot umak, so tarpalagut epeng mambaen tambangta,” ningna.

“Jia daoan sampado Medan,” ning Si Poso.

“Tarsarupo ma epeng tambangna,” ning Si Siti.

“Tai, saro Indonesia dei i Medan, Umak. Ompung nami pe saro Indonesia dei i, Umak?,” ning Si Pikek.

“Olo, Inang, ompung muyu saro Malayu dei, ima so ringgas-ringgas homu marsiajar, so malo saro Malayu,” ningna.

“Inda langa sarupo saro Malayu dohot saro Indonesia i, Umak?,” ning Si Poso.

“Sarupo, harana saro Indonesia i tingon saro Malayu dei parjolo ro na,” ningna.

Udan simbur-simbur pe madung mantak, udur alai mangalao i gadu saba i nalangka muli tu huta. Erer-erer so ulang tarsulandit. Inang ni alai mangompa daganakna tingon abara siambirang, aronduk i abara siamun. Si Pikek manjing-jing udon dohot uali; Si Poso manungkapkon durung i tu ulu nia.

Dung i bagas, na turnguk do Si Siti juguk markarosi i tingkap dapur. Udan rimbus marayak Magorib les pupu manyimbur. Bope pamataina tu udan i, nagada tu si roana.  Lungun ni roana tu inang nia lumobi gogo, ngada pe merer dung do marsapa Si Poso satontang ompungna nangkin dompak i sopo i.

Lungun ni roana do na gogo, tai anggo giot marsuo ngada pe tolapsa.Angke namabiar dope ia tu amang nia, ima namangayak ia tingon bagas ni alai 15 taon nasolpu partunda naso ipatola amang nia ia marbagas tu Si Imran, ima alaklai nia sannari.

Muko ni inang nia pupu ro tu roa nia, muko nanilungunkon. “Masonjia ma roai inang ki i amian, torkis do roai,” ning roa nia.

Bolasan taon parsarakan tardokon do na lolot, mari-ari ngada unjung be tarida sanga iras dope sanga na madung jumolo. On ma nasib namandao, naso adong hobar sanga madung songonjia. Pala na iras, adong dope roai parsuoan, sanga andigan baya ngada binoto.

“Songonjia do lungun mu tu boru mon. Lungun ni roa mu ma lungun kon, umak, tai ngada binoto ho sanga ijia au baya. Mohopkon boru mon na durhako on,” ning roana laos matunguk-nguk manaonkon nyiak ni ate-ate.

“Oh Tuhan, pala les mangolu dope umak ki, lehen ma hairasan. Lehen ami marsuo bope sanoli. Tai, pala na madung jumolo, palapang ma ia i bagasan ni kubur, jagit amal ibadahna ya Rahim ya Rahman ya Kuddus ya Malik” ning roa nia mandoa. Ngada tarpaso ilu na manetek, na tangis matunguk-nguk mardangol manyarira naso tartaonkon. (marsambung)