MARSIDAO-DAO (episode 29)

Marsidao dao grafis

Novel Mandailing

Nanisuratkon : Dahlan Batubara

I Huta Donok, tar pukul 5.40 kehe si Pikek maridi tu tapian; Si Poso parorot anggina i bagas. Tarsigop do alai ngot na, harana pature anggina nibaen inangna na kehe mangomo marsidao-dao tu huta balian.

Muli tingon tapian, oban do Si Pikek aek sa ember ambaen paridian anggina i alaman bagas i, naniparidi i bagasan ni ayan. Ibuotsa aek milas tingon termos padomuna tu aek nangali i. Ipatutoru Si Poso anggina tu alaman bagas i, ilehensa tu Si Pikek nangkan paridina.

“Ke ma abang maridi, so sigop ita tu sikola,” ning Si Siti sareto paridi anggina i ayan i.

“Olo. Ulang ona sabun i tu mata nia, da,” ning angkangna.

“Olo, ma malo ma au i. Ma iajari umak ma ua nasanoli,” ning Si Pikek. Dung i, mangalao Si Poso kehe maridi tu tapian.

Dung sidung alai marbaju sikola, ipalalu alai mangan tu dapur. Aum-aum alai dua juguk i pantar i salaos manyulangi Si Rahim, harana Si Rahim angkon na isulangan dope manganna.

Iompa Si Pikek anggina salaos aruar tingon bagas. Sidung igoruk Si Poso bagas i, mangalao alai kehe tu sikola salaos maroban anggina tu ompung Rosma an nangkan parorot Si Rahim.

“Naron kotu ma ualap ia, Ompung,” ning Si Siti tu ompung Rosma sareto mangarkari pambolit parompa pangompa ni anggina.

“Olo, Anggi. Denggan-denggan komu sikola tie,” ning ompung Rosma.

“Olo, Ompung, ke ma ami,” ning Si Poso sareto mangalao dohot Si Pikek tu sikola.

Tangis do Si Rahim i ambitan ni ompung Rosma, na mangiut tu angkangna namanadingkonna i bagas ni ompung Rosma i.

Sapetona, ngada adong parkouman dohot ompung Rosma, sian barisan ni kahanggi nadao do. Nibaen adong alapanganna, ima so ia parorot Si Rahim. Ganop ari ilehen Si Siti do nian saotik panabusi timbako parsugi-sugina, tarsongon upa parorot pomparna.

I huta Huraba, i tonga saba i, mamangkur Si Siti dohot donganna. Mata ni ari sior tingon ginjang. Tar bolak ma sidung alai pangkuron i. Ima namangomo i lupak ni saba ni alak. Sasanoli ibasuna mukona na marbustak mapistak tingon pamangkuran i.

Tarahim-tarahim kotu Luhur, maradian alai tu sopo saba i, nangkan mangan kotu dohot sumbayang. Sidung sumbayang, na margulung-gulung ma alai santongkin so ro mulak gogo ni pamatang nangkan nagiot palalu pangkuron santak tu pukul 5 potang ni ari.

Muli tingon sikola Maktab potang ni ari, ialap Si Poso anggina tu ompung Rosma. Ngada si Pikek mangalapsa, harana angkon sigop do ia mardahan tu bagas.

“Ujulang ma ia soni, Ompung, nga malo au mangompa,” ning Si Poso.

“Bo baya, olo da,” ning ompung Rosma sareto patongon Si Rahim tu abara ni Si Poso. Ibolitkonsa parompa i tu ak Si Poso, harana nadua tangan Si Poso angkon togos maniop gurung-gurung Si Rahim ijulangan.

“Ke ma ami, Ompung. Tarimokasi, Ompung,” ning Si Poso.

“Olo, Anggi. Togu-togu i dalan so ulang targompang,” ning ompung Rosma les jong-jong manaili alalao Si Poso namanjulang anggina mamolus banjar i.

Ira-ira pukul 6, dung ijagit alai upa pangkuron tingon nampuna saba i, mangalao ma alai tu topi dalan godang nangkan painte Anatra maroban muli tu huta na.

Tolap tu Huta Donok, manaek Si Siti tu bagas. “Assalamu’alaikum,” ningna salaos mangaruak  pintu i.

“Walaikumsalam. Umaaak, ma ro umak, anggi e” ning Si Pikek sareto mangambit anggina padonokna tu inangna.

“Waaaa. Ikle baya, itadingkon umak ko sadariaon, Amang,” ning inangna salaos mangambit Si Rahim tingon ambitan Si Siti. Marsior-sior tarida tompa Si Rahim mangiligi inangna na madung ro.

“Tangis do ia nangkin, Inang,” ningna tu boruna.

“Olo, Umak. Dompak ami tadingko n i ompung Rosma an, tangis mangiut ia,” ning Si Pikek.

“Bo baya. Pabahat sobar tile, Amang,” ning inangna salaos pamemek Si Rahim i pantar tonga i.

“Tai, muli sikola arob, abang Poso do mangalap ia tu ompung Rosma an, giot mardahan au antong sigop,” ning Si Pikek.

“Olo, Umak. Tai ujulang do ia ba. Nga malo au mangompa pake parompa, antong,” ning Si Poso.

“Bo baya, nga maua i, Amang. Imaia palan-palan so ulang targompang,” ning inangna.

“Maua ma karejo ni umak nangkin na marsidao-dao i,” ning Si Poso.

“Mamangkur. Inda pe siap, harana bolak doma saba ni bayo i. Ra dope dua ari on so sidung pangkuron nai,” ning inangna.

“Ganop ari mada umak kehe marsidao-dao,” ning Si Pikek.

“Olo, Inang. Ima goarna marusao, so adong panabusi panganonta. Imaia, bisuk-bisuk komu i son pala kehe umak marsidao-dao, da” ning inangna. (marsambung)