MARSIDAO-DAO (episode 4)

Marsidao dao cover

Novel Mandailing

Naisuratkon : Dahlan Batubara

Andos dope torang niari i, ma tarbege sora ni kuhuran ni Si Siti tingon dapur ni bagas i, marsitune-tunean dohot sora ni tarahim tingon masojid, ima namaraek kotu Subuh. Gamok-gamok dope ilala ia mata nia namangkuhuri. Alaklai nia si Imran les namodom dope i amparan parpodoman ni alai i bilik. Soni muse si Poso dot si Pikoh les namarsialus-alusan dope ungkorna namodom i pantar tonga i.

Jaru pe soni tarsonggot do modom si Imran ibaen sora nia kuhuran ni dadaboru nia. Ipajuguk ia laos marngeat-ngeat pamatang nia. Tarsigop do ia nalangka tu apea gurison so tibu targuris sude bona ni apeai. Ima so tibu dadaboru nia i mardahan baen boal tu gurisonan.

Madung do lobi sataon lolotna namadabu arga ni gota. Sude halak pangguris di huta i dohot huta balian namarkancit ibaensa. Bahat ma namorong-orong manaonkon parsuadahan. Namaranduk boti marsali dahanon ma tarmiduk i parjagalan, angke ngada na tuk epeng pangomoan panabusi dahanon guleon pala rihit daganakna, mari-ari epeng tambang ni daganak na sikola SMP boti SMA di pasar Panyabungan ngada tola maranduk tu parsupir i. Ima so adong sada-sada daganak ni halak naso kehe tu sikola ibaen naso adong epeng tambangna.

“Nangkin ariani ro do Uda Muklan manunggui epeng solangani,” ning Si Siti tu alaklai nia i laos mangapoli indahan i bulung pisang.

“Sonjia nimu tu mamak i,” ning Si Imran laos mangaumkon indahan tu papangan nia.

“Udokon, upokatkon jolo dot bere ni uda, ningku. Naopkopan ia tu epengi harana ngada be dong ningai naitiop nia. Mari-ari daganak nia narihit, namarsikolaan muse. Inda saru sajia be ningia buniago ni ihan laut i, baen naso bahatibe sannari manabusi ibaen parsuadahan ni halak sannari”.

“Songonjia doma, tile. Aropku ngape tuk epengta manggararna sude”.

“Tar onom ratus lima pulu ribu maia naupajopkon. Imaia sude, lobi nai panabusi dahanon guleon doma. Pala serei doma ita gadis tambana so gonop sajuta lima ratus ribu”.

“Kehe ma au jolo tu bagas nia maroban na onom ratus lima pulu ribui naron dung muli au sian gurison, nga sabinoto sanga adong dope alapangan panggararan,” ning Si Imran.

“Pala angkon sude do ningia gararon, serei doma igadis panggonopi ni epengi,” ning dadaborui.

“Oloda umak ucok, angke masona sude halak namarsuada namarkancit”.

Madung lobi sataon lolotna alai dung manyolang epeng 1.500.000 tu Si Muklan mambaen panggarar parubatan i rumah sakit nasolpu, ima mangubati Si Poso namarsituhuk ona malaria nagogoi, harana jabat do ibaen mantari i jarum gantung. Sapetona targarar alai do sugari parubatan i rumah sakit i pala igadis serei, tai sonima goarna namarontip ulang sugari itapor sere pala les na adong dope dalan boluson. (marsambung)