MARSIDAO-DAO (episode 41)

Novel Mandailing

Nanisuratkon : Dahlan Batubara

Marsidao dao grafis

Dohot do udur dadaboru ni Muklan mangalao mangalusi pio-pio inang ni Si Poso i. Dung juguk Muklan dohot dadaboru i, iobarkon Si Siti nangkan sannari ma sugari pinomparna manandai ompungna boti amangtuana i Bilah.

“Inda tolap au be sanga tujia, Amangboru. Mabiar au inda sompat alai manandai ompung ni alai. Mari-ari umak pe ngada iboto alai sanga ijia au sannari. Mungkin alai sian Bilah doma mangaligi au tu son batas. Ima, tu kahanggi doma upasahat maroban alai tu Bilah,” ningna.

“Jadima, Maen. Pasada ma roamu, anggo maroban alai, namomo mei,” ning Muklan.

“Olo, Amangboru,” ning Siti.

“Anggo songoni, ita pio jolo mar dua kahanggi so ita pokati borngin on. Pio ma jolo uda Rojob dohot uda Isrot mu, anggi,” ning Muklan tu Si Poso.

“Olo, Ompung,” ning Si Poso sareto mangalao aruar tingon bagas i.

Dung rap lagut Si Rojob dohot  Si Isrot i bagas i, iobari alai ma akehean tu Bilah i sanga andigan, dungi ise nangkan mandongani daganak i.

“Anggo songoni, au ma soni maroban alai, harana au jot-jot dontong tu Ranto Parapat, inda dao bei sian Bilah,” ning Si Isrot.

“Dungi, andigan ma roa mu lapangna waktu mu, Amang” ning Muklan.

“Aropku, ancogot ma ami kehe, ning Uda. Harana tolu ari on tarlapang au, ima so ancogot aropku. Tile kakak, tama do ningroa ni kakak ancogot ami marangkat,” ning Si Isrot tu Si Siti.

“Tama ma nian, anggi,” ning Si Siti.

“Anggo soni, manyogot ma homu marangkat,” ning Muklan.

“Ioban anggi adong sa ameh ison, ima igadis so adong epeng muyu tu Bilah,” ning Si Siti.

“Pajiar ma, Inang. Sian ami ma sude biaya ni alai. Ulang jabat pikirkon i, ima gunana ita na markahanggi, marsitolongan ipardangolan. Na marubat i ma situtui, dungi doaon so ipas alai marsuo dohot ompungna i Bilah” ning Muklan.

Sogot ni ari sidung mangan manyogot ma aroro ni Si Isrot mangalap alai tu bagas. Si Poso dohot Si Pikek pe madung do sidung markobas nagiot mangalao kehe tu Bilah i. Muklan dohot dadaboru i, soni muse deba kahanggi madung do i bagas i nangkan pabuot alai, soni ombar jiren, marsijalangkon sijalangon tu Si Poso, ima epeng tamba-tamba ni tambang dohot parmangan i pardalanan.

Anggo tambang ni alai dohot parmangan madung do sapetona itiop si Isrot nanitumpur alak kahanggi borngin i i bagas ni Muklan i. Jaru pe songoni, somalna i luat Mandailing, bope madung manumpur, laing angkon namanjalangkon do so lamam ilala napabuot koum niba pala kehe mardalanan tu na dao.

Gorar ni hutana i Bilah madung do isuratkon Si Siti tu sakalambar karotas. Ima gorarna Kampung Bilah, Kecamatan Bilah Hilir, Kabupeten Labuhan Batu. Gorar nia, gorar ni mandiang alaklaina soni muse gorar-gorar nangkan nanitopotkon madung isuratkonna.

“Marsapa ma alak anggi dung tolap tu uta i. Sahuta dei bagas nami dohot bagas ni amantua Si Poso,” ning Si Siti sareto mangalehen sada gambar tu Si Isrot.

“Onma foto nami dompak baru-baru marbagas najolo. Ipatidaon anggima so momo anggi manjalai bagas nami,” ningna.

“Olo, Kakak. Dungi, nomor HP-ngku pe madung ma ulehen tu Uda Muklan, so momo marhubungan tu son,” ning Si Isrot.

“Olo, Anggi. Copat hubungi tu son sanga sonjia i sadun,” ningna.

Inagiot mangalaoi, manjalang do Si Poso dohot Si Pikek tu inangna soni muse tu alai na lagut i bagas i. Sidung manjalang, aruar do sude koum kahanggi dohot ombar jiren i pabuotna tingon jolo bagas i.

Si Siti hum najuguk do i pintu i pabuot daganak nai, ngada tolapsa jongjong i alaman i nibaen sibukna lumobi oyang. Mata marilu mangaligi pomparna namangalangka i, na kehe manjalaki huta ni ompungna i luat na dao.

Ilu ni matana na mardabuan i ngada hum nibaen maribo niroha, tarsunggul bage do ibana na madung marpadan tu mandiang alaklaina i na solpu i, ima padan nia i ginjang parkutahan ni amang ni dagankna nangkan patandaon pompar ni alai tu ompungna boti amangtuana.

“Pasada ma rohamu, ayah ni si ucok. Bope naso adong parmarsuonta dohot alai i Bilah, pinomat daganakta tarida alai, namaroban tompanta tu amang dainang dohot amangtuana,” ningna ibagasan rohana tu mandiang amang ni pomparna.

“Oo..Ayah Umak, na langka ma paompumu manjalai homu, maroban tondi tu bagasta. Pala les naso marsuo be ita, ligimu ma tompa ni alai ubat ni lungun muyu tu au, boru muyu on,” ning rohana. (marsambung)