Marpalan Sotik Dongan Mangabiskon Epeng Ni Rakyati

Madung marbilang miliar ma abis epeng ni rakyati namarpili pamimpin di Madinaon ditaon nadung salpu, naerror muse dope ningna, nangkan naulahan musema pemilukada ulang ningna gorarna, anta piga miliar nai nangkan naabis, tos mada ita biarku patunda napilkadaon, rap asok-asok dongan ita pikirkon, anggo umna manoskondo namomoan dei karejoi, pala sataon ita palagut-lagut epeng ni rimbang dohot bulunggadung santongkin dei mangabiskonna, haraanii ulang dongan marsimomo hita namangabiskon epeng sangantong iambang namaju hapengani naaterekdo curut-curut cudang ning halak saro tole.
Songonima pandokon ni Sutani turunan ni Namora Pande Bosi sian Kotanopan, isuratkon jolo tu surat kobar ningibana anso mamboto sude dongan-dongan dijae dohot dijulu, anso ulang marsimomo hita di satontang epengta nangkan mambaen pambangun ni Madinaon, marpupu marpili pamimpin, inda cukup dua sanga tolu noli sambang dei boto eor-eor ujungna sar-sar mei tompiani.
Madung ipabulus ni pamarentah musema ningna hajatna nagiot marpili ulang, madung ditanda tangananma ningna anso ipakehe muse epeng ni Madinaon anso ulang janggal namarpili pamimpin, sugarina antong anggo bolas pangidoan niba martopima karejo, kasalahan nadung lalu anso inda martarimo karejonati manjadi pelajaranma dihita, ning Sutani manuturkon tonana tu hita rakyaton khusuna namarmian di Madinaon.
Ulang nian pala marpili muse hita sala sakiek makan sabonang, diambang nadung lidang hapengani napolang, iambang nadung gartip hapengani na marjantodo, ulang nangkan na dua noli hita rakyaton tarlubang, namarabis-abisdo boto sinadonganta harani nasala pasang nakaru dei, haraniima ansi palan-palan ita pikirkon ulang nagkan namaprpupube sala, nadung salpu marpili pamimpin hita habis epeng margoni-goni, hapengani na error musedo ning halai sian Jakarta, palan-palan madongan ita pikirkon sanga isedo hita naotoi, sanga rakyat namapiliondo, sanga calon nangkan nagiot piliontaido, ato sanga halaido sian KPU ato halaido sian Panwaslu.
Nabisuk-bisukando putra-puta Madina ning Sutani, adongdo pengacara terkenal, adong Jenderal, adong Tehnokrat, adong konglomerat, adong birokrat, haranii maila ita dongan disatontang harenjonta namarsalahan, idokon dongan hita halak Madina naoto sanga namapintartu, nadangol dei boto.
Ulang jabat lopus sugarina, masosaktu, masompittu, mapintartu,mabodotu, malanjangtu, sangape namapondoktu, nasegamei sude, haraniima nagkon ita jabat sugarina manaek-naek tiang listrik hita manggantungkon sipanduk manyosak KPU anso copat ita namarpili pamimpinon, ita lehenma hasompatan dihalai sanga andigando ning halai waktuna, anso ulang marsosak-sosak halai, malang sega muse karejoi ita rakyaton juo dei nadangolna, arana maita rasoi namarpili pamimpin nalewat pasdo songon namangayup epeng tu asakan.***(Bayo Lubis)