Novel Mandailing

Naisuratkon : Dahlan Batubara

Mataniari tar geleng tu jae, tai inda pedo megelengtu, tar onok dope so kotu Asyar. Ombus ni angin lumobi gogo mambaen bulung-bulung ni arambir merbas-erbas tu siamun dohot tu siambirang.

Eme nagumorsing na i saba na bolak boti mar gadu-gadu tarida songon ombak ni laut tarombus angin maroban muap nauskus, songon muap ni durame i toru ni rinti. Bope naso manyabi dope alak par saba, tai muap durame dodasma taranggo tu igung, tando inda sajia onok nai be nangkan manyaraya ma alak parsaba.

Daganak naopat halak i pe taru napupu ma marlojong-lojong i gadu ni sabai. Dung do muli alai tingon sikola, na satahi ma alai nakehe marjajo tu saba-saba an. Ngada binoto ba sanga giot mangua alai tu saba-saba i. Pala pasuo antong bona ni pining na adong tarida asar ni amporik sikodit, ipanaek alai sareto mangaligi sanga adong anakna sanga inda. Pala adong anakna tar godang namatumona marabong riar, ipaijur alai dohot sarang nai, nangkan ipinahan alai i huta, ibaen i sada cangkak sanggar, harana maso on bahat dope burir ni eme mambaen panganon ni amporik i.

Pala pirana do i asar ni sikodit i, dodasna itolon daganak i nagorsingnai, so iras sibuk ningna. Tai inda sude ibuot alai pira nai, itadingkon alai sanga dua sanga martolunai, so ulang agoan inang ni sikodit i ningna.

Tai sadarion, daganak naopati ngada manjalaki amporik, namarlolo maia alai. Dompak pasuo bona ni parira, taru namarsirais doma sada-sada mambuot danon ni parirai. Si Poso antong iordok ia do sada dangka ni parirai sobaru irintakkon ia jojar-jojar ni danon nai. Si Kuklom taru taronyor, marupek doma dangka nai ibaen ia. Si Lindak ipanaek ia antong, harana tar menek pamatang nia ima so inda murdung bona ni parirai ibaensa. Si Lagut ngada mambuot ia, mangido do ia tu Si Lindak tar lima jojar.

Sonima alai namardongan-dongani, dodas rap tu jae tu julu marmayam sanga pe marjajo tu saba dung muli tingon sikola. Sian kalas 2 Sikola Dasar santak tu sannari kalas 5 madung mardongan alai naopat. Pala borngin dung muli mangaji tingon bagas ni Guru Yahya, nakehe ma alai jalang. Manombo marpataliaon alai dot alak banjar i, manombo marrene-rene. Pala tar longgom do iginjang tando nagiot udan, dodasna alai marjuguk-juguk i lambung sopo pambayuan ni bujing-bujingi. Tai, pala ro poso-poso tu sopo i, alai pe kehe morot tingon i, harana dodas dei iparsianyangkon poso-posoi alai dohot obar “kehe mu marmayam, daganak, muap sikodit komu ulala,” ning poso-posoi. (marsambung)

Comments

Komentar Anda