MARSIDAO-DAO (episode 10)

Marsidao dao cover

Novel Mandailing

Naisuratkon : Dahlan Batubara

Durus ni udan na santak gogona, ima udan borngin. Si Imran dohot amang-amang i huta i mar marsakan i lopo Si Leman i. Angke ngada targuris bona ni apea muda nalitak ibaen aek ni udan.  Adongma tar dua poken na madung parudan i. Poken nasolpu pe ngada sadia halak maroban gota tu partimbanganan, angke tar dua ari bage do na targuris bona ni apea i, ima dompak tar hiang i kobun gurison.

“Aropku, kehe ma ita jolo mangaleles tu Hutabargot, antap ra marharasoki,” ning Si Dalkit.

“Bana juo mantongan i, Lae,” ning Si Rotul.

“Dohot ma au, tiopon pe ngada sajia be. Anggo parudan sajo do na tolu bulan on, mangan somangan ma ita on,” ning Si Jaleto.

“Tu Sarahan do maso on ubege tar deges lubang ni halak namarbatu serei. Pala tomtom ma ilala hamu, tu Sarahan ma ita,” ning Si Imran.

“I Siorbo pe ubege ra do halai namarlubang i. Tuari sada, halak Si Rosib, Si Imsar dohot Si Kalayo dapot halai do ubege 2 garam kadar 90,” ning Si Leman tingon tataring ni lopo i laos patuba soban ni pamilasan ni aek i.

Sogot ni ari dung mangan manyogot kehe ma halai 8 halak ima tu Hutabargot nangkan mangaleles. Marsioban goni na ibagasan ni aronduk, aek inumon dohot bohal indahan. Honda na opat, dua halak sa honda, ima honda naburuk, honda ni parkobun ningna goarna naso adong sayap ni roda pudi boti i roda jolo. Jugukanna pe na makasuak, boti sorana songon sora ni sinso naburuk.

Dung tolap tu Huta Julu, ipasahat halai ma honda ni halai i tu halak parparkir ilambung ni lopo i. Huta Julu on pala goar ni pamarentahna ima Hutabargot Nauli i Kecamatan Hutabargot. Huta Julu on ma huta parkamindil muda aroro ni iba tingon aek Batang Gadis na sian Adian Jior.

Bahat do halak pajongjong lopo boti panyahatan ni honda ni halak namarlubang boti na mangaleles ima i lambung ni pos Kehutanan i. Arian naborngin les pupu dei rongom maratak-atak honda na ipasahat boti halak na markopi, ima halak na kehe dohot na muli sian parlubangan sere an. Harana ngada arian sajo halak na paipaulu i sodun, borngin pe bahat do halak.

Inda na marlubang sude halak na i dolok Hutabargot i, harana ampuna lubang somalna igoar toke lubang, ima halak namarepeng i namamake atoban mangalubang tano i, ima atoban na tingon luat Jawa. Adong na tingon Jawa Barat adong muse na tingon Jawa Tengah.

Adong muse sipanaru, ima na manaru batu i tingon dolok an tu topi ni huta i, ima iganan ni galundung na paalus batu i so tarsarak sobu ni batu i dohot sere nagiot gemboson i.

Dungi adong muse goarna pangaleles. Halak Si imran dohot dongan ni ia na pitu halak i tardokon ma pangaleles. Ima halak namanggaer-gaer batu namabongka-bongka na iambungkon parlubang i. Dodasna iambungkon ngada sadia dao tingon baba ni lubang i.

Ima arasoki na tingon dolok Hutabargot i. Sanga ise pe na ro, rap adong be do arasokina. Ngada sude ji halak parlubang i batu-batu na ipahat ni alai i, adong dei iambungkonsa ima naso adong tarida marisi sorbuk ni sere.

Batu na ipahat na tarida tompa ni jalur i ibaen ma tu goni, ima batu namarisi sorbuk ni sere, ioban  tu ginjang, iatak i sopo-sopo ni parlubang i so itaru sipanaru tu galundungan. Pala suada tarida tompa ni jalur ni sere i ma na iambungkon alai, ampas ma ningna goarna. Ibaen tu bagasan goni muse nangkan ioban tu ginjang nangkan ambungkonon i lambung ni baba ni lubang i. Harana muda inda diambungkon, ngada adong payakanna i bagasan lubang i. Angke lubang nai ngada bolak, tampil-tampil parmeosan ni alai parlubang i maia.

Maroban batu na ipahat i tu ginjang ngada na momo, harana ra do bagas ni lubang i santak 200 meter tu toru ni tano i. I toruan ma halak Jawa i mamahat batu sere i. Ngada tolap alai be mar osa ibagasanan, angkon na iombuskon doma sialalogo dohot kipas angin tu toruan ima na itaruon dohot palastik na hibul na ginjang.

Madung bahat do halak na jumolo i bagasan ni lubang na i Hutabargot i. Dodas ma tarbonggal halak marjumoloan i lobang i, ima na itinggang batu-batu karak namagar-gar i lubang i. Deba ngada be tarela jenazah nai, angke ngada targare be karak namagar-gar i.

Sian taon 2010 santak tu taon 2015, marratus ma terbege halak najumolo i lubang an. Adong antong alai si parlubang i ma najumolo i. Adong muse halak naso parlubang, ima halak na kehe manjalaki arasoki manuil-nuil lubang na madung itinggalkon ampuna lubang i.

Tarmidukma ipalagut alak Si Imran batu-batu namatapori i. Anggo sa ampang be ngada tudia sada halak. Adong do tolu pangalelesan na igaer-gaer alai manjolungi batu-batu namatapori i. Sapetona adong do roa ni alai mijur tu lubang ni na madung naso marnampuna be, tai ipasari-sari ngada adong be serena harana lubang i na madung bahat halak namarsituil, ima na sabulan on. Ima so manggaer-gaer pangambukonan i doma iopkop alai.

I namaraek kotu Magorib do alai mijur na langka muli. Marsiporsan batuna be. Bope marsiporsan, ngada marsada-sada alai ampuna batu i, sirapan do. Dung tolap tu huta ma iparung-rung alai batu i, ipasada nangkan rap manuk-tuk. Dung tartuktuk sude, ima na madung songon sasagun tompana, ioban alai tu galundung na i lambung Saba Jambu, ima galundung ampuna Si Jamal halak Gunung Manaon.

Adong do tolu jom onokna galundung i moron-oron ioncong masin diesel. Baen na onok i, ima so juguk alai painteon ima i juguk-jugukan na adong i galundung i. “Mudah-mudahan markarasoki ma ita ,” ning Si Imran.

“Olo da, mudah-mudahan,” ning si Dalkit.

“Ampas na tingon lubang na ilambung silinjuang i do aropku na tar deges i,” ning Si Rotul.

“Aso idok ko songoni,” ning Si Imran.

“Harana dompak upamanat-manati nangkin tar deges do uida jalurna,” ning Si Rotul.

“Mudah-mudahan mada,” ning Si Imran.

“Songionjia doma ita pala inda markarasoki batuon. Tiopon pe naso adong be i bagas, na on doma opkopon so adong panabusi dahanon ancogot,” ning Si Jaleto.

“Rap mandoa ma ita,” ning Si Imran.

“Ibagas pe dabo ngada na adong be, dahanon tuk tu tolu ari nai doma,” ning Si Rotul.

“Pala tama do ilala homu, ita cubo ma jolo kehe marsidao-dao tu huta balian. Ubege i Huraba dompak masona sannari manyabi,” ning Si Imran.

“Bo, i pe antong tama mei, dohot ma au sada” ning Si Rotul.

“Olo, sangajo dalan ni pangomoan mei. Andigan ita kehe,” ning Si Jaleto.

“Aropku, aduan ma ita kehe, harana incogot manggembos batu on dope ita,” ning Si Imran.

“Soni pe bolas mai,” ning Si Jaleto.(marsambung)