MARSIDAO-DAO (episode 19)

Marsidao dao grafis

Novel Mandailing

Nanisuratkon : Dahlan Batubara

Dung do sidung manaktak sibodak dohot mambongka arambir, na marmulian ma deba tu bagasna. Tar dua tolu kahanggi sisolkot dohot Si Muklan boti Maramis les juguk dope i sopo i mangidup-idup sareto manyirup kopi.

Si Poso pe madung muli do parjolo, harana ngada sadia dao bagas ni alai tingon bagas orja i. Dompak markopi i ma iecekkon si Imran tu kahanggina satontang nagiot maroban daganak nia patandaonna tu ompungna na adong i Bilah, mari-ari nangkan marsuo ma dadaboru nia dohot inangna i Bilah dung mariganan dohot ia bolasan taon na solpu, ima namariganan naso ipatola ni amangna.

Munduk-unduk do ulu ni kahanggina na manangion obar ni Si Imran namanjamitaon na iroana  i sopo i.

“Aropku, tama ma tingon sannari ipatandaon daganak i tu ompungna. Harana, paompu do pamborgoi  milas ni ulu, paompu ma ubat ni lungun, mangubati bugang ni indora, ima daganak ni daganak niba namaroban mudar niba i bagasan ni pamatangna” ning Si Maramis.

“Aupe aropku, masona ma sannari parmaen i marsuo dohot inangna. Sonjia pe songonjia, bolasan taon ngada marsinidahan, lungun so lungun  naso tartaonkon nangkan jalak-jalak dei inangna tu boruna. Soni muse amangna, nangkan malungun tu boruna, namanyosal dohot maribo ni roa pe madug lugut marlagut ma aropku i indorana. Aropku oban ma alai tu Bilah so marsuo nanilungunkon boti paompu nabisuk-bisuk nangkan na pupu mangarsak ompungna dongan margiri i tobang ni umur,” ning Si Mulkan.

“Au pe sapandapot do au dohot Uda nadua,” ning kahanggi na sada.

“Imada, Uda. Anggo songoni, tama ma ulala. Jaru pe songoni, uligi ma jolo ari na tama maroban paompu dohot parmaen ni Uda,” ning Si Imran.

“Lagipe antong, ho pe anak, na malungun ma aropku tu sudaro-sudaro muyu na adong i Bilah, alai pe aropku les inte-inte do taili tu jolo alaman ni bagas sanga andigan do mungkap sudarona,” ning Maramis.

“Olo, Uda, harana alai pe ngada binotosa sanga ijia igananku sannari,” ning Si Imran.

“Tai, aropku, angkon na dohot do ita dua sanga na tolu alak mandongani alai tu Bilah. Harana, bope sanga sonjia, sada boti nadua natobang nangkan pagogohon tondi niparsuoan ma tongkin nai i sodun. Mari-ari so tarida alai namarkoum marsisolkot do babere ni alai i pandaraman,” ning Muklan.

“Anggo songoni, pade ma aropku ita oban on tu pantar bolak ni kahanggi. Harana luas poken nangkan adong muse mangido asaya i bagas ni Si Basiron, aropku i si ma ita pokati nagiot langka tu Bilah on,” ning Maramis.

“Bo, tama ma anggo songoni,” ning Muklan.

“Au pe tama ma ulala, ning Uda. Bope soni les tu Uda nadua do upasahat maroban on tu pantar bolak ni kahangginta. Angke alak uda maia tardokon amang niba i Mandailing on,” ning Si Imran.

“Jiar ma dabo amang. Pasada ma roamu,” ning Muklan.  (marsambung)