MARSIDAO-DAO (episode 23)

Marsidao dao grafis

Novel Mandailing

Nanisuratkon : Dahlan Batubara

Dua bolas ari Si Imran nagulung i, ima namarsituhuk malaria, ngada pe adong tarida tu murakna. Mangalao aruar bagas pe ngada tolapsa. Dai ni indahan les paet do ilalasa. Imaia, namatondik i ngada be ro. Marnyiang marsik muse do tarida pamatangna. Ima dalannna so ioban dadaboru nia ia tu ruma sakit.

Dadaboru i ma paturesa i ruma sakit dohot Si Rahim na iambitan, harana  Si Pikek pe madung ona malaria do, ima so tading Si Poso pature anggina i bagas. Arun ni Si Pikek ngada suman santakna songon amang nia, harana les natolapsa do lao tu tapian. Marubatna pe tu mantarian maia marsuntik.

Manyogot muli do Si Siti tingon ruma sakit, harana nangkan pature bagas dohot mardahan ji alai. Dung kotu Luhur muse ma ia kehe tu ruma sakit santak tu manyogot nai. Sonima rundutna muda dua alak marsituhuk i bagasna. Ngada adong sada ni roa, ngada tarbaen mangomo.

Saonok i ruma sakit, madung bahat epeng aruar. Sere na ipajopi pe madung do pupu iurakan mambaen panabusi ubat dohot tambang na pual pail tu ruma sakit, soni muse panabusi dahanon guleon. Ganop potang-potang les pupu do ro kaum sisolkot kahanggi boti anakboru soni muse ombar banjar na ro manungkir situhuk ni Si Imran i ruma sakit mandokon hata sobar-sobar sareto mengalehen silehenon tu Si Siti.

“Sebenarnya potensi malaria sudah habis dari tubuh suami ibu, tetapi komplikasi penyakit akibat penurunan daya tahan tubuh sebagai dampak malaria itu yang harus kita tunggu penyembuhannya,” ning dokter na sian Medan i tu si Siti.

“Oh tuhan. Bolehkah kutahu, Pak,” ning Si Siti.

“Baiklah, Bu. Suami ibu terkena anemia parah. Itu terjadi akibat kerusakan sel darah merah yang disebabkan parasit malaria. Selain itu, indikasi kegagalan fungsi organ tubuh. Malaria telah menyebabkan pecahnya organ limpa. Ada lagi potensi gagal ginjal dan gagal hati, tetapi tak terlalu parah dibanding limpa ini,” ning dokter i.

“Ya Allloh”.

“Ibu harus sabar, berdo’alah semoga kita dapat menyembuhkannya,” ning dokter i.

Siti aruar sian bilik karejo ni dokter i, alalaona palan homang songon na giot unjar. Ipajuguksa i parjugukan balerong ni ruma sakit i, ialuksa Si Rahim naniompasa sareto matunguk-nguk manaonkon marsak naso tartaonkon. Ngada ibotosa be sanga sonjia be. Tu na tangis doma pangaduanna.

Ibagasan namatunguk-nguk i, tarbegesa sora ni televisi na adong i jolo parjugukan i, sora ni parkobar obar namangobarkon malaria i Mandailing. Iligisa televisi i salaos aek ni matana namardabuan.

“Wabah malaria yang terjadi sejak dua pekan terakhir telah menewaskan setidaknya 63 orang di Kabupaten Mandailing Natal dan Kabupaten Tapanuli Selatan. Pihak Dinas Kesehatan Sumatera Utara sejauh ini telah melakukan kordinasi dengan dua kabupaten yang terkenal dengan potensi endemic malaria itu,” ning pangobari i televisi i.

Mangalao si Siti songon na manyuhung-nyuhung tu bilik ni alaklai nia. Sora tangis mangangguk alak najaji tarbegesa sian bilik na sihil ruma sakit i, ima pangangguk ni adaboru-adaboru na jumolo alak sabagasna.

Ipajuguksa i siambirang ni rosbang pargulungan ni alaklai nia i. Ipamanat-manatisa tompa ni amang ni daganakna na dompak modom lambok ostang. Aek ni mata nia mulak aruar sareto mangapus obuk ni amang ni daganakna. Ngada ibotosa be sanga songonjia, tu tuhan doma pangaduan nia dohot doa, mangidohon ilehen airasan tu amang ni daganakna dohot ilehen asobaran tu sia so les togos pature alaklaina.

Songonima gorit ni namangolu iginjang portibi on, usao do na idalankon, tuhan do namanotopkon. I pukul 4.40 marayak andos torang i ma ibolus Si Imran, na kehe manopotkon tuhanna, ima na jumolo manadingkon dadaboruna dohot pinomparna na menek-menek.

Manadingkon tahi tu pinomparna, tahi naso lalu kehe tu Bilah maroban pinomparna tu ompungna, maroban dadaboruna tu amangtulang dohot inangtulangna naso marsuo bolasan taon.

Motor Ambulance maroban almaruhm Imran tu hutana. Nangkan ipature fardu kifayah dohot fardu ‘ainna. Dua alak kahanggi, tolu alak anakboru mandongani Si Siti paudur ambulance i.

Kahanggi boti anakboru madung paombang amak dohot saung-saungna i alaman ni bagas i. Inang-inang pauli paulion i bagas, paombang asur i pantar tonga bagas i na ilampis dohot parompa ima ganan gulungan ni almarhum Imran.

Dung sumbayang Subuh, terbege tingon masojid sora ni boa-boa : “Assalamu alaikum warohmatullohi wabarokatuh. Innalilahi wa inna ilaihi rozi’un. Iumumkon tu sude masyarakat, bahaso madung maninggal i pukul 4 i, ima na margoar Imran atau aya ni Si Poso natinggal i banjar Rambutan. Nangkan ikebumion naron kotu luas Luhur. Sonima pangumumanna usudahi dohot assalamu alaikum warohmatullohi wabarokatuh”. (marsambung)