Songon nabiaso alak dikampung pula dung loja-loja marusaho tontu les natulopo ujungna maradian sareto giot laos manyirup-nyirup kopi paet. Songoni mada disada maso ima topekma diari Salasa dilopo nisi Jakombang, bahat ma tarpaida alak namarkumpul palidang-lidang pat dilopo i. Sareto diari I bahat alak dihutai mandung mandaek sarojitana pastimei mandung cerah ma nida parboi nialak dilopoi harana anggo sebelum ari sinoyan markilimi doma boi ni ummati limus songon Sihim. Diatia kira abis kotu luhur roma si abdul surkut ngun bagas rencana nia git minum kopi paet tulopo si Jakombang. Ias doma songon Bayar Bachan piul pe lobi doma songon piul ni kico-kico natorngan ari baen sonangna maklumma manaek arga gota sakalian mandung martimbang dohto toke gota tontu mabahat tukaran narata-rata dicakui ditamba potangnai mandung ro pertemuan ngun Kabupaten.
Mamartimbang Lae ning si Udut ma nguntopian sambil mangubak-ubak kacang goreng mamuloi hata tu si Paet. Indape lae harana ipajolo alakdo mandaekna anggoau lomah doma ulala pamatangi apalagi donok ari Rabu pambayaran utang nidahanon sapokenon ning si Nehruma lomah-lomah mangalus.
Pas asik-asikanna mangeceti roma si Abdul Surkut tulopi “ Kopi jolo lae marcendok” ning si abdul surkutma tu sijakombang, bia laeon songon nasalado roangku parbegeanku biasona ngamarcendoki ningsi Ning Parlopoi tu Si Abdul Surkut marsianyang. Baen ma ba lae naso iboto ho donanga on musim pilkada bahat tuldangon tusi tusi iba epeng jadi angkon nai nikmatido epeng ni calon-calon tai harana kayo-kayoan dabo ubege. Adongtong inda nida jabat alak namambagi epengi sai nabahatna sareto lampasna epengi ningia ning Si Abdul Surkutma pagodang main. Harana antong bahat nidai ia dilopoi TS ni calon nalain manyirup-nyirup aek milas. Anggo au makehema au borngini pertemuan les deges douida rasoki iamplopi totopsajo dope tukaran nasoralitaki ning si Abdul Surkut busema. Imada laengku ning si Abdul Jogetma mangalus tingun jolo nitipi I ” au pe nagit kehedope tu kabupaten pasuo dohot pautanki harana ningkalak ima nakayona tingun calon calon nalaini um gaji niape lobi do sagaji ni bupati ubege ima sokehe aun mangalap parbagian ning si Abdul Jogetma mambalos. Um tanona inda nida topi-tutopi perusahaanna marpulu ning Si abdul Jogetma patinggi main. Pas idokon si Abdul Joged marbuncilakan ma mata nialak salopoi mambegena. Isemei lae ning si Paetma manguduti bisa do au gari dohot dongan mandongani laei tu Kabupaten ning si paet. Inda bisa laei I harana laei naasingdo pautanna jadi sega mei non tu kali kali nabiaso turan bagi Sada romei Kerja Bagdu (Bagi Dua) mei torus tu Kerja Bakti (bagi tiga) jadi inda bisa ning si Paetma manggodang buseng. Ima da lae anggoa aupe pautanki um na kulolloh maia upana aso udokon songoni nadorma ulala pertemuan mandata les nasobar dohot karotas doma uida upana.
Hira-hira dipukul 2 panas masituasi dilopoi bahatma namarsi sindiran songoni namarsiogaran sampe-sampe serius dohot panasna caritoi tarimum si Abdul Surkut Doma Parbasuan nasoi angkat ni Parlopi nakabotulan imejai. Inda iboto sanga aha natarjadi marungkam meja Kecap dohot Galas matapori rupana mandung marsipistakan Si Abdul Surkut dohot Si Abdul joget dilopoi. Nabahat doma mangoraina sampe-sampe solop nisipaet pe magotop padahal solop on solop nagodang arga naikirimkon nianaknia nia ngun Jakarta poken nalewat. Dame-punya dame inda natardameon alhasil malanjang caritosampe tu Kantor Polisi. Maklumma ita anggo tukantor polisi tontu marurusan dohot hukum pula inda masuk penjara tontu angkon napindah mei balok nikobun. Pancabut purkaro nipardamean. Alhasil alak do namancalon sadalak marbujal bibir nalainna mela ipon dohot pindah balok nikobun padahal calon nai bangga-banggaon niape belum tentu dope masuk ulang-ulang nakalah bosengdope. Ahirna marsalisi dimasyarakat rap marsisiloan dohot marsiosoman padahal nasakampungdo. Jadi kasimpulanna Gaja Do Pagaja Gaja Landuk Do Natarkapit ( Alak do naipagodang-godang dohot bibirpe manggenjal sareto mela ipon itamba pindah balok nikobun) taonkonma Songoni Lae angkentong Alakdo Namarpolitik dohot-dohotanko sikolamupe Batang Pisangdo…………

Comments

Komentar Anda