MARSIDAO-DAO (episode 40)

Novel Mandailing

Nanisuratkon : Dahlan Batubara

Marsidao dao grafis

I jolo bagas i, ielana mulak epeng na 15.000 i tingon cakukna, igolomna nangkan ilehensa tu inangna. Tai, dung tontang pintu i, nidasa ma anggina Si Pikek juguk manyuhung na tangis-tangis maniop kadak manareon mudar nanibatukkon inangna i pantar tonga i.

Sibuk ni inang nia tungkap martungkol cikukna tu bantal i manyuhungkon uluna tu ginjang ni kadak i na mambatukkon mudar i. Si Rahim pe na tangis do i lambung ni angkangna. Marlojong doma Si Poso tingon pintu i sareto mancakukkon  epeng i mulak tu cakukna.

Simbur ma Si Poso pature inangna. Isuruna Si Pikek mangambit Si Rahim so ulang tangis be. Dung mantak na mambatukkon mudar i, ipainumsa inangna dohot aek na dangol-dangol kuhu. Sidung manginum aek i, ipagulung inangna mulak i bantal i laing pupu godang-godang parkosana.

Lambok mandang do ilala Si Siti sibukna i gulungan i, mambaen marsak tu rohana. Marsak nibaen situhukna naso adong tarida tu dalan ni murakna. Marsak pasari-sari pomparna na lamot-lamot naso maramang. Onpe, anta ngada lolot be ibana mamparkayaon daganak i, anta na jumolo ma baya mangihutkon alaklaina. Ise ma tongkin nai pature alai pala jumolo au, ning roana mur ma marsak.

“Ya Allah, berilah kesembuhan pada hambamu ini. Lindungilah anak-anakku, ya Allah ya Malik ya Kuddus,” ningna ibagasan rohana mandoa.

“Masonjia ilala umak,” ning Si Poso.

“Madung lapang indora i,” ning inangna.

“Ma mangan ma umak,” ningna.

“Madung, Amang. Adong giot dokonon ni umak tu homu dua,” ning inangna.

“Olo, Umak, idokon umak ma,” ning Si Poso. Si Pikek pe ipajuguksa ma tu lambung ni angkangna mangadopkon inang ni alai i.

“Ningroangku, sannari ma waktuna homu dua kehe tu Bilah, marsuo dohot ompung muyu, ayah dohot umak ni umak dohot amantua bope bou muyu,” ningna tu pompar nai.

“Aso ami dua sajo, Umak. Dohot ma umak dabo so ita sude kehe tu ompung an,” ning Si Poso.

“Por do roa ni umak dohot, mari-ari madung marbolas taon naso marsuo dot ompungmu. Tai, inda bisa umak marmotor be,” ning inangna.

“Icubo dabo soni, Umak, anta bisa do umak marmotor,” ning Si Pikek.

“Inda, Inang. Homu ma soni kehe. Pala dung marsuo dohot ompung muyu, ompung muyu doma mungkin ro tu son mangaligi umak,” ning inangna.

“Anggo soni, andigan ami kehe, Umak. Ise dongan nami,” ning Si Poso.

“Pio ma ompung Muklan mu borngin on, so ita pokati,” ning inangna.

“Olo, Umak,” ning Si Poso.

“Mangan ma ho jolo, sidung mangan ma alap ompung Muklan mu,” ning inangna.

Sidung mangan i, na kehe ma Si Poso tu bagas ni Muklan mandokon pio-pio ni inangna tu bagasna.

Sakehe ni Si Poso i, na marilu ma mata ni Siti malungun mulak tu inang dohot amangna i Bilah, na itadingkonsa bolasan taon na solpu i. Marsarak dohot inangna; marsarak dohot amangna naso patolaon ibana marbagas dohot Si Imran. Ima so haruar ibana dohot alaklaina tingon Bilah manjalahi luat iganan ni alai i na dao, ima luat Mandailing on.

“Mangolu dope ho roai, Umak. Bolasan taon ita marsarak, naso marsipaidahan. Naso upaboa tu homu sanga ijia au na monjap on, mohopkon au, Umak, boru mon na durhako on, mamben homu agoan manjalaki au sanga tujia,” ning rohana mambaen iluna mur majaji.

“Nalungunan do ulala tu ho baya umakku, malungun do au tu ayah. Uboto do lungun mu tu boru mon. Lungun ni roa mu ma lungun kon, Umak, tai inda bisa au ro ibaen panyakit na madung ro,” ning rohana salaos papitpit matana mardangol manyarira naso tartaonkon.

“Onpe na ro ma paompumu na dua manopotkon ko. Pala madung jumolo do ho umak, tu parkutahan man doma paompumi manido, tando na adong ompungna i Bilah. Ya Allah pertemukanlah anak-anakku dengan nenek kakeknya ya Rohman ya Rohim. Jangan wafatkan ayah dan ibuku sebelum bertemu dengan cucu mereka, amin ya robbal alamain,” ningna salaos mangapuskon talakpak tanganna tu mukona.

Tolap Si Poso tu bagas ni kahanggina i, iobarkonna sidokonon tu Muklan, na pio-pio inangna nangkan pasahat tahi tu kahanggina. (marsambung)