Namur-mapincur Doma Boto Parkouman Songon Pusuk Nirobung

Mur-moderen zaman ning halak sannari mur mapincur parsudaroan sangape parkouman, anggo pandokon ni halak napistar, erosi ningia gorarna, songonima tangkangna boto maso sannari, bope idokon tobang-tobang di bagas paradatan hatiha ipatobang pinompar napabolak pinggan panganan gorarna, anggo sapetona mur pincurdo parkouman sangape parsudaroan dimaso sannarion.
Anggo pandokoni sutani sian napa-napa ni gunung Sorikmarapi marmocom-mocomdo sobobna anso mapincur parkouman sangape parsudaroan maso sannarion, napurtamo ima parbinotoan ni jolmado namur-manonga-nonga langit, anggo mangamalkon parbinotoan pala dapot halakna 10 halak sahuta madung bahat mei.
Napaduana harani parbinotoan naincatima momo halak manjalai alasan namaringan-ringakon paraturan naiturunkon niompunta naparjolo sunduti, arana anggo alas an naadong sajo dei antong, ibarat ni alasan aso male boltok, tontu malosok mangan ningna mei ning sutani.
Napatoluna madung malo jolma ilmu matematika, ulang sugari marugi diparetongan, anggo pituah ni tobang-tobang nadung parjolo mulak tu rahmat ni Tuhan igogoan mangomo anso adong dalan mangaligi siriaon sanga sidangolon ni koum kahanggi dijee dohot di julu, sangape balanjo maramal ibadah, anggo halak kabahatan sannarion manggogoi marusaho anso kayo rayo do, arena sinakayoan doma naporlu dijolmai di maso sannarion. marbalut-balut nian epeng martakar-takar muse sugari sere sigumorsing.
Napaopatna ning sutani indabe manatap parkouman sanga parsudaroan, manatap sinakayoan ni halak doma kabahan, pala miskin koum nia tarbotope disia adong sidangolonna, inda adong namandokonna diau ningia tai madung iboto iadoba, tai pala halak namaradong koumon Nabulus mardikalma bope koum nadao, dongan saompung maia, nabi Adam mantong ompungna, Nabulus langkama marsuo dohot halak namarsinadongani.
Napalimana mur-soadong jolma mangobankon adat istiadat niompunta naparjoloi, arana anggo ajaran ni simatobangta naparjolo, pala nabile sudaro niba ulang ipabile-bilebe, pala nabodo ulang ipabodo-bodo, pala dompang marnyae itungkir salos ioban silua indahan kopol gulena incor naiboyom sanga ikan tori naiarsikkon, pala dompak susah dihangoluanon ibantu satuk niroa, natobgang-tobang dihormati, daganak disayangi, naurang roha diajaran anso mabisuk, songonido anggo ajar poda ni amanta naparjoloi.
Tai ning sutani dimaso sannarion, pala nabile koumi ipabile-bile, nasatonga rintik dope lalu manjadi rintik, nabodo ipabodo-bodo, ibarat ni arambir namutuk dope, lalu error, nahurang roa ipancieh-ciehkon, itambahan muse gorarna ima gorar layas, natobang-tobang inda dihormatanbe, ipaalo-alo doma anso bangkit naisandang niai, pala bangkit martatama antong dongan, songonimada hangoluani maso sannarion..
Napaonomna anso mapincur parkouman sangape parsudaroan harani maolna halak sannarion patureon sude sala dinamangolu ningna doma pandokonna, namaol halak sannari patureon, nagiot manjadi pamimpin doma halak kabahatan, rumah tangganape naso tarpature iado, nadohot musema calon kepala desa, namarbangkiang-bangkiangdo halak di hutai, marudur-udur halak nakehe mangurus surat tu kantor giot manjadi katua kampong, padiar marsego-segoan namarkoum kahanggi patunda namancalon kepala desa rado halaki anggo zaman saikion.
Jadi anso ulang nian sugari mur mapincur parkouman sangape parsudaroan, angkon naibankondo ajar poda ni ompunta naparjoloi, ima adat istiadat, nadengganma halak namamboto dohot namangamalkon adat istiadat ni ompunta naparjolo, marsitogu-toguan di dalan nalandit, marsitungkiran di hal ni sidangolon, marlagut –lagut dihal nisiriaon, pala adong dapot ursa diarangan ipartaruon mei sotik-sotikbe tu koum kahanggi anso rap mandai, indaba itoskon sado-sado iba cukup gule sabulan, songonima sugari pangalaho ni hita namangoluon ning sutani martona anso isuratkon.*