Poda Nalimado Angkang Ulang Poda Naonom

Anggo ajar poda ni ompungta naparjolo sunduti poda nalimado inda poda naonom namartamba maso sannarion dei, baen pinbtar-pintar ni halak sangape baen akal-akalna itambai dongan poda nalimai manjadi poda naonom. Antusanni poda napaonom naipe paias caku nidonganmu, inda nacocok boto anggo songoni bope songonima nasalalu tarjadi zaman sannarion.
Poda nalimai ma songoni ita tiopi arana ido tutur dohot ajar poda ni ompung-ompungta naparjo, anggo poda naonom naidokon-dokon ni halak sannari ima paias caku ni donganmu, halai namarkuasoi mei marsipaiasan, bope naiporus nia landit angke alai sama alaido padiar songoni nangkon uruskon, romalang nyaemu tile.
Pala mangecek dabo binege di lopo politik, nasangkal-sangkalma burangirna anggo nagiot mambuat jabatan, idia dei baya ipamuati halai sasai bahat ningroa jabat, marpulu kobek nabagedo carito ni halai, haraniima rupana anso marrempotan, patunda poda naonom ima paias caku ni donganmu anso adong binege istilah didokon-dokon halak Camat Begu, artina Camat Bekas Guru.
Arana anggo inda baen nara gurui ipaias caku nia inda naadong tarida di kamus guru nangkan namaniop pemerintahan, guru tugas mulia nia mangajari anak-anak ni bangsoondo anso marbisuk, inda nagiot memegang tampuk kekuasaan di lingkungan birokrasi./tai pade dilalai gurui sabahagian ipais dongan caku nia, lalu mantong nadiroa niai manjadi Camat begu ma intilah kerenna.
Anggo ipasari-sari asok-asok nadeges mada poda nalima naituturkon ni ompunta naparjolo sunduti, paias parabitonmu, paias pakaranganmu, paias rohamu, paias pamatangmu, paias panganonmu, nangkon itambabe dohot poda naonom, paias caku ni donganmu, arana ajar poda namambaen markiti dei.
Ajaran ni agamantape antong mandokon songon pandokon niguru-gurunta binege tongosan ni Rasulullah tu ita ummat niaon, jago ningia lima targan soro nalima, tontu poda nalima juo dei gorarna, ima jago sehat targanso marnyae, jago poso nipamatang targanso matobang, jago sinadongan targan soro kemiskinan, jago kasehatan targansoro nyae, oni jago hangoluan targan soro hamatean.
Haranii antong totopma ita puliaro poda nalima naituturkon ni ompunta nadung parjolo mulak tu Tuhanta, ulang ita tamba-tambai manjadi poda naonom, songoni tu daganak-daganakta ita tuturkon musema tu halai anso turun temurun poda dohot ajar niompuntai lalu sangandigan tu akhir ni maso.
Arana anggo asok-asok ita pikiri, madung lengkapma sude anggo dung tar amalkon hita poda nalima, insya Allah salamat mei dunia akhirat, pala dung ias songon poda nalimai, sinok mei modom, ringgas marusaho, gogo muse mei mar amal ibadah arana madung ipaias ate-ate.****
By : Lubis