MARSIDAO-DAO (episode 32)
- account_circle Dahlan Batubara (Redaksi)
- calendar_month Jumat, 1 Jul 2016
- print Cetak
Marsidao dao grafis
Novel Mandailing
Nanisuratkon : Dahlan Batubara
“Biarku nga ipatola guru i ioban ko ia tu bagasan ni kalas,” ning Si Bujing Manis.
“Tu kantin ni etek Manna i do gari ami pajagohon,” ning Si Poso.
“Oh..olo, keta ma so ita sapai etek Manna,” ning Si Taing. Ipaudur alai Si Pikek dohot Si Poso tu parjagalan ni Si Manna na adong i jae ni sikola i. Si Manna ma si parjagal i lambung sikola i saonok na on. Pala maradian sikola pukul 10, tu parjagalan i ma daganak manabusi sanga marjuguk-juguk, ima parjagalan na bandar martiang opat tingon bulu, songon aratak martarup bulung karambir nanitimpoi dohot palastik na bolak.
Songon na tarsonggot do Si Manna mangiligi aroro ni daganak sikola i na rongom tu parjagalanna. Mur tarsonggot dung nidasa Si Pikek mangompa daganak na menek.
“Oi baya, Pikek. Aso ioban ko anggimu tu sikola on,” ning Si Manna dung tolap si Pikek dohot daganak-daganak sikola na rongom i tu parjagalan i.
“Imada, Etek. Umak nami kehe mangomo marsidao-dao. Biasona ompung Rosma dei manjago anggi nami. Tai, marun ompung Rosma. Mangido tolong jolo ami tu Etek, ami anggun anggi nami i son, Etek,” ning Si Poso. Sip polngit sude daganak na rongom i painte alus ni Si Manna.
“Bo baya, nga maua bai, Inang. Ioban ko do uida parompana. Anggun ma ia i son. Pala tangis ia naron bope uanggun-anggun. Tai, pala nga ra sip sanga pipis bage, bope upio ho tu kalas i,” ning Si Manna.
“Olo, Etek. Tarimokasi ma tu Etek,” ning Si Pikek sareto mangarkari pangolit parompa ni anggina tingon abarana. Tangis do si Rahim dompak isurduhon Si Pikek ia tu Si Poso. Tangis mabiar mangaligi alak na rongom i.
“Ulang ko tangis, Anggi. I son do abang dohot kakak,” ning Si Poso salaos mangebeng-ebengonkon pamatangna pasip anggina.
Ngada sajia onok, dompak pauli-uli pangkobetan anggunan parompa i Si Pikek dot Si Manna i poren bulu ni parjagalan i, ro sada guru dadaboru tu si. Ima guru kalas 5 na margoar guru Rini. Ima guru ni Si Poso.
“Bo baya, anggi mu dei, Poso,” ning guru Rini.
“Olo, Bu. Kehe umak nami mangomo marsidao-dao. Ompung Rosma marun, ngadong be manjago anggi nami, Bu” ning Si Poso laos paso na mangebeng-ebengkon anggina, jongjong so mangadop tu guru Rini.
“Olo baya. Naron ma so uobarkon tu guru kalas tolu da, Amang. So bisa Si Siti pupu kaluar kalas pala tangis anggimu, da,” ning guru Rini.
Dung ipainum Si Pikek anggina, ianggun-anggunsa anggunan i sareto mangendeon ende-ende, ima ende-ende ni namanganggun. Madung mangkuling lonceng sikola, nagada pe tarpodom anggina i anggunan. Daganak-daganak sikola marlojongi tu alaman sikola i; Si Pikek les pupu dope anggun-anggun idongani Si Poso.
“Ke ma mu dabo, Inang, so ulang tarlambat. Au ma jolo manganggunna,” ning Si Manna.
“Olo, Etek. Tarimokasi, Etek,” ning Si Pikek.
Akehe ni Si Pikek dohot Si Poso i tangis do Si Rahim. Ima natangis mardangol mabiar nanitadingkon angkangna. Bope songoni, pupu do ianggun Si Manna.
“Modom ma ho, da Amang, sikola kakakmu. Inda na dao ia, ro do ia tongkin nai,” ning Si Manna sareto mangendeon enede-ende manganggun. Marlapang dope ia parorot Si Rahim, harana alak pe ngada pe adong naro manabusi tu parjagalan i, angke sipanabusi pe daganak-dagank sikola do.
Salaos tu bagasan ni sikola i, itopotkon guru Rini do guru Sakdiah, ima guru ni kalas 3. Iobarkonna satontang namaroban anggina Si Pikek tu sikola, ima nanianggun i parjgalan ni sikola i.
“Bo baya. Olo, Eda. Tarimokasi, naron ma uecekkon tu Si Pikek,” ning guru Sakdiah salaos mangalao tu bagasan ni kalas i.
I jugukan nia i, ngada sada roa ni Si Pikek. Les tu anggina do roana, harana na tangis do dompak itadingkonna nangkin. Boti muse, marsak do roana sanga songonjia mandokonna tu guruna, harana naso niobarkon ni angkangna Si Poso dope ilalasa tu guruna.
Ipaunduksa uluna dompak nidasa mangalao guruna tu kalas i. Ngada barani ia manalion guruna. Mangaramang-ramangi ibagasan roana sanga songonjia mandokonsa tu guruna satontang na naniobansa anggina tu sikola i.
“Pikek,” tarbegesa sora ni guru Sakdiah mamiosa. Dosar taroktokna mambege pio-pio ni guruna. Iabinsa uluna manaili tu guru Sakdiah.
“Olo, Bu,” ningna.
“Tu son ma ho, Inang”.
“Olo, Bu,” ningna sareto mangalao tu jolo, tu lambung ni guru i. Sude donganna manaili tu sia. Sudena sip polngit mambaen taroktok Si Pikek mur masanting.
“Ijia langa inanta, Inang,” ning guru i dung jongjong Si Pikek i jolo ni guru i.
“Kehe mangomo marsiodao-dao, Bu,” ningna damir.
“Bo baya. On dope langa inanta kehe mangomo, Inang,” ning guru i.
“Inda, Bu. Ari-arion do umak mangomo. Ompung Rosma sajo do manjago anggingku, Bu. Tai marun muse ompung Rosma, ima so nga uboto sanga tujia marobanna”.
“Oh. Jiar ma dabo, Inang. Tola do ho naron kehe pature anggimu pala tangis ia sanga tuaek”.
“Tarimokasi, Bu,” ningna salaos mangapus iluna namardabuan.
“Pasada ma roamu da, Inang, ngada gusar Ibu,” ning guru i salaos mangapus obuk ni Si Pikek.
“Olo, Bu”.
“Imaia, naron dokon tu umak so ijalaki ia parorotna, so ulang susah ko namarsiajar da, Inang,” ning guru i salaos mandokon tu si Pikek so kehe mulak tu jugukanna.
Dung ibaensa parsiajaran i papan tulis i, mangalao guru Sakdiah tu ruar. Ima na kehe tu bilik ni kapala sikola i, mangobarkon satontang Si Pikek namaroban anggina tu sikola.
“Nagoso mei tile. Jadima, Bu. Pala les iobansa dope ancogot, bope bapak obarkon tu kahanngina dalan tamana manjago danak i. Ibo roa, tai songonjia ma ita baen, ulang jabat sega parsiajaran ni murid ta pala adong dope dalan si dalanon,” ning kapala sikola i.
“Jadima, Pak. Anggo songoni masuk ma au mulak tu kalas,” ning guru Sakdiah sareto mangalo aruar.
I huta Lumban Dolok, tajak-tajak Si Siti dohot donganna i parlasiakan ni parlasiak i. Odokna maneteki tingon isangna nibaen las niari lumobi milas. Sasanoli urker do batukna, ima so pupu iinumna aek panginuman nanipatibal i ginjang di pamatangi i. Mar jop ni roa do ia dohot donganna na madung mandapot pangomoan i, harana ngada jabat muli manyogot alai ibaen nasuada pangomoan. (marsambung)
- Penulis: Dahlan Batubara (Redaksi)
