Novel Mandailing

Nanisuratkon : Dahlan Batubara

I ari Kamis i, maradian do alak mangomo. Soni muse Si Siti ngada kehe marsidao-dao. Jaru pe songoni, na kehe do ia tu saba pambaenan ni alai i, paampe aek harana nangkan manajak boti manyabur ma alak parsaba.

Nibaen nangkan namanajak i, nangkan manajak do ia tingon ancogot santak i nasapoken on. Ima so ngada kehe ibana marsidao-dao. Ulang jabat parkamindil parsidung ni tajakon ni saba nia tingon saba ni alak, ima so udur do ari-arai on nangkan itajaksa saba i.

Harani na giot udur sapoken on naso mangomo i, ima so manjombur eme ia so ulang manabusi dahanon be, so sun otik parkehe ni epeng ari-arion.

Ari Jumahat dung muli alak sumbayang Jumahat, na kehe ma Si Siti tu saba oban tajakna. Batukna les urker i nalao i laing ambit ompa daganakna boti sandang arondukna.

Sidung ipapodomsa Si Rahim i anggunan loba i sopo i, ipangkalna tajakon i lupak donok tu sopo i. Tajak-tajak sareto batuk-batuk i arilas i.

Salupak dua lupak pupu do sidung. Marayak kotu Asar i mur masitutu urker ni batukna. Dompak asongkoran ni batuk i itulbaskonsa isokna tu lupak i, ampe mudar do. Bolnang not-not doma ia paligi-ligi mudar nia i. Tarsonggot, nibaen on dope irasoina na mambatukkon mudar.

“Ya, Alloh, lehen ma jau kesembuhan, ya Malik, ya Rahim,” ningna salaos manulbaskon isokna muse tu talakpak ni tanganna. Mudar rara. Inda ibotosa be sanga songonjia. Iantaksa na manajak i. Kehe tu sopo i ipajuguksa anta mur erer songkor ni batuk. Dung markobas, sigop ma ia muli tu huta, harana marsak ni roana tu situhukna pupu do mur mamarsak.

Sabtu manyogot, tu ruma sakit Panyabungan paresohon situhukna. Dung iligi isok nai i laboratorium, na ona virus do aru-aruna ning dokter i. Ilehensa sakarambar karotes resep nangkan obanon tu apotik manabusi ubatna.

Dung mangan pel dohot sirup i, ngada sajia santak songkor ni batukna saborngin on.  Ari Akad ngada kehe ia tu saba, mabiar dope mur ro batuk darona. Ima so ari Sinayan doma ipalalusa tajakon i, bope erer-erer panajaksa, ulang jabat manggurgar batukna. Sonima arasokina, santak sidung do tajakon i bope santak 10 ari parlolotna. I na sapulu ari i ma sude dohot manyabur na.

Dung sidung saburan i, maradian do ia mardua ari. Madung ro do ontang mangomo sian alak Si Saleha tu na marsidao-dao, tai nibaen nangkan maradian do ilalasa, ima so ngada dohot ia marsodao-dao i nadua ari i.

Tai, ngada songoni goritna. Ngada dua ari ia namaradian i. Namadung gulung do ia namarsituhuk i. Sibukna na mur maniang i, ngada tolapsa kehe marsidao-dao mangomo tu huta balian. Ngada um i, tu sabana pe ngada tarulangina be. Hum sian bagas tu tapian maia na tarlolona.

“Alap ma jolo ampung Muklan mu,” ningna tu Si Poso luas Magorib i.

“Olo, Umak,” ning Si Poso salaos mangalao aruar bagas tu bagas ni Muklan.

Dung ro Si Muklan dohot dadaboruna, nanijamana ma tangan Si Siti. Madung dame do ilalana tangan nai.

“Aropku, tu ruma sakit ma marubat, Maen,” ning Muklan.

“Mabiar au inda tuk epeng, Amangboru” ning Si Siti.

“Anggo parubatna dabo Inang ipudi ita pikirkon,” ning Imran.

“Adong do naupajopi  5 ameh. Ioban Bou ma sanga sajia tu pasar manggadisna,” ning Si Siti.

“Isi tongkinnai porluna, isima ualap. Na ponting tu ruma sakit ma ho jolo,” ning dadaboru ni Muklan.

Rumbuk ni tahi, saborngin i do Si Siti ioban tu ruma sakit Panyabungan. Nanigoruk do bagas i, harana Si Pikek dohot Si Poso soni anggina Si Rahim dohot do tu ruma sakit.

Parkahanggian boti parmoraon dohot ombar jiren pupu do ro manungkirsa tu ruma sakit i, manyapai sisapaion, mangalehen silehenon. Sonima na markahanggi marmora na marhuta, marsitungkiran do pala dompak adong na marsituhuk, mangobarkon hata sobar-sobar soni muse maroban siobanon.

Manyogot muli do Si Poso dohot Si Pikek tu bagas nangkan na kehe tu sikolana. Mangan manyogot i bagas ni Muklan do alai, so ulang sabat Si Pikek mardahan manyogot ibagasna. Muda arian, dadaboru ni Muklan sanga dadaboru ni Mahlil ma mandongani Si Siti i ruma sakit.

Adong do tolu ari lolotna i ruma sakit, nanijarum gantung bage do jabat. Tai, sonima arasokina, matogos do ilalana sibukna, boti batukna pe mangerer do songkorna. Ima, potang ni ari na muli ma Si Siti tu bagas.

Madung tolapsa do tu jae dot tu julu, sanga pe tu saba, tai anggo mangkarejohon saba ngada pe na tarjamana. Mardahan, mambasui dohot manyapsap dope nalaluna.

Sapoken dung i, nakehe ma ia tu saba mangalamlam. Tolu ari sidung ia do lamlamon i. Ima so kehe ia marsidao-dao dohot donganna tu huta Lumban Dolok.  (marsambung)

Comments

Komentar Anda